Policia ka arrestuar një 38-vjeçar, pasi i premtoi një shtetasi se do t’i jepte një shume parash, për t’i blerë votën në interes të një subjekti politik.
I arrestuari, M.Leka, dyshohet se i ka marrë kartën e identitetit një shtetasi, e i ka premtuar 500 mijë lekë të vjetra, në këmbim të votës për një parti politike.
Mbi të rëndon kryerja e veprave penale “Korrupsioni aktiv në zgjedhje” dhe “Marrja e përdorimi i paligjshëm i dokumentit të identifikimit”.
“Specialistët për Hetimin e Krimeve të Komisariatit të Policisë Lushnjë arrestuan në flagrancë shtetasin M. L., 38 vjeç, banues në Lushnjë, për veprat penale “Korrupsioni aktiv në zgjedhje” dhe “Marrja dhe përdorimi i paligjshëm i dokumentit të identifikimit”.
Nga hetimet e kryera në bashkëpunim me Prokurorinë e Fierit, dyshohet se shtetasi M. L. i ka marrë një shtetasi, kartën e identitetit, si dhe i ka premtuar dhënien e një shume parash, dyshohet me qëllim blerjen e votës në favor të një subjekti politik, pjesëmarrës në zgjedhjet parlamentare të datës 11.05.2025”, njofton policia.
Materialet procedurale i kaluan Prokurorisë kundër Korrupsionit dhe Krimit të Organizuar, për veprime të mëtejshme./Opinion.al
