Tregjet financiare globale kanë hyrë në një fazë shqetësuese turbullire, me një humbje kolosale prej 9.500 miliardë dollarësh të regjistruar në vetëm tre ditë. Në këtë atmosferë ankthi ekonomik, Gjermania ka dalë me një deklaratë të fortë që ngre alarmin për gjendjen e Shteteve të Bashkuara të Amerikës.
Ministri gjerman i Ekonomisë, Robert Habeck, deklaroi sot nga Brukseli, në përfundim të Këshillit të Tregtisë së BE-së, se presioni më i madh në krizën aktuale është mbi SHBA-të, duke parashikuar se vendi nuk do të mund të rezistojë gjatë përballë një kombinimi tejet të rrezikshëm të faktorëve ekonomikë.
“Presioni është para së gjithash mbi amerikanët. SHBA mund të përballet me një recesion të thellë të shoqëruar me inflacion të lartë – një përzierje toksike për çdo shoqëri të hapur,” u shpreh Habeck.
“Do të shohim se si do të përballen me këtë krizë, por ata nuk mund të qëndrojnë gjatë në këmbë, veçanërisht nëse Evropa arrin të jetë e bashkuar dhe të forcojë aleancat me vende të tjera të prekura nga kjo çmenduri tarifore.”
Deklaratat e ministrit gjerman vijnë në një kohë ku politikat tregtare të SHBA-ve po kritikohen gjerësisht, veçanërisht nga vendet e industrializuara aziatike si Japonia, Koreja e Jugut dhe më së fundi edhe Indonezia, të cilat kanë filluar të ndjejnë efektet negative të masave proteksioniste amerikane.
Kriza aktuale financiare ka nxjerrë në pah edhe një herë sa i brishtë është ekuilibri ekonomik global. Ndërsa Wall Street-i vazhdon të luhatet me ndjeshmëri të lartë, dhe bankat qendrore janë nën presion për të ndërhyrë me politika të reja, bashkëpunimi ndërkombëtar shfaqet si elementi kyç për të shmangur një recesion të përgjithshëm, raporton Reuters.
Habeck i bëri thirrje BE-së që të forcojë bashkëpunimin me partnerët strategjikë ndërkombëtarë, duke theksuar rëndësinë e një fronti të përbashkët kundër “çmendurive tarifore”, që sipas tij po thellojnë jo vetëm pasigurinë ekonomike por edhe përçarjet gjeopolitike.
