Në Spanjë një grup studiuesish kanë krijuar një sistem të quajtur Neurologyca i cili mund të dallojë emocionet njerezore, dhe madje është në gjendje ta bëjë këtë njëkohësisht për një grup të caktuar personash.
Neurologyca shpreson të avancojë Inteligjencën Artificiale, duke përmirësuar mënyrën se si ndërveprojnë njerëzit.
“Ne jemi një kompani e inteligjencës artificiale. Kemi shpenzuar shumë vite për të krijuar modelet tona bazuar në emocionet dhe aftësinë për të kuptuar intensitetin e tyre. Në këtë mënyrë kuptojmë gjendjen emocionale të njerëzve”, shprehet Juan Grana.
Drejtuesit e Neurologyca në stendën e kompanisë në një ekspozitë në Londër shpjegojnë se sistemi i tyre ofron vlerësime të inteligjencës emocionale në kohë reale.
“Teknologjia jonë përdor një bibliotekë me mbi 13 miliardë pika të dhënash për të kuptuar emocionet njerëzore me sinjale video. Ajo që shihni këtu janë tre kamera të ndryshme që matin tre gjëra të ndryshme. Kjo kamerë e parë është ajo që ne e quajmë matja jonë e parë. Pra, të gjitha këto pika të vogla që shihni këtu janë të gjithë njerëzit që janë ulur. Kështu që ne mund të kuptojme qindra dhe madje mijëra njerëz në të njëjtën kohë. Teknologjia jonë është e instaluar në stadiume futbolli dhe aeroporte, dhe ne mund të përcaktojmë nëse një turmë është e interesuar, entuziaste, e mërzitur, e emocionuar”, tha Marc Fernandez.
Por cili është qëllimi i këtij sistemi?
“Misioni ynë këtu është thjesht të përpiqemi që inteligjencën artificiale, ta bëjmë më njerëzore, ta bëjmë të kuptojë shumë më mirë komunikimin me qenien njerëzore nga pikëpamja empatike, nga pikëpamja emocionale”, thotë Juan Grana.
Përmes Inteligjencës Artificiale mund të dallohen një gamë e gjerë emocionesh.
“Kjo është një matje e vetme e fytyrës me precizion mjaft të lartë. Ju mund të shihni këtu se ne dallojme stresin, dhe pozitivitetin. Ne mund të konstatojme deri në 92 emocione të ndryshme. Për momentin po tregon vetëm tre prej tyre”, shton Grana.
Madje përmes kësaj teknologjie mund të identifikohen edhe probleme shëndetësore.
“Rezulton se kur dikush ka të ngjarë të ketë një goditje në tru ose një hemorragji, ata fillojnë të shfaqin emocione unike që janë të padukshme për syrin e njeriut, por që ne mund t’i kapim me teknologjinë tonë. Dhe ka mikro lëvizje të fytyrës suaj, ka zgjerim të syrit. Kështu ne mund të parashikojmë përpara se të ndodhë një problem i caktuar shëndetësor”, shpjegoi Marc Fernandez.
Sistemi është ndërtuar në atë mënyrë që mos të shkelë të drejtat e privatësisë dhe rregullat etike.
“Nëse shihni këtu, ka disa pika. Këto pika të vogla ngjyrë vjollce lëvizin përreth, kështu që sistemi ynë është plotësisht pa fytyrë. Ne kurrë nuk kapim asnjë të dhënë identifikuese personale. Ky sistem është ndërtuar në Spanjë në përputhje me të gjitha standardet etike dhe të privatësisë”, përfundon Fernandez.
Shumë kompani sot në botë po e përdorin Inteligjencën Artificale në funksion të aktivitetit të tyre. Sipërmarresit preferojnë të kryejnë biznesin e tyre në internet sot, dhe me mungesën e komunikimit ballë për ballë, është e vështirë për kompanitë të kuptojnë se çfarë përjetojnë punonjësit dhe klientët e tyre.
Në këtë situatë, përmirësimi i sistemeve të tilla mund të luajë një rol kyç. Një shembull i tillë vjen nga korporata amerikane e sigurimeve, MetLife, e cila vendosi të përdorte një sistem të ngjashëm në dhjetë nga qendrat e saj të për të kuptuar më mirë gjendjet emocionale të klientëve dhe t’u sigurojë agjentëve këshilla për bisedën dhe zgjidhjen e konflikteve në kohë reale.
Si rezultat, MetLife dëshmoi 6.3 për qind zgjidhje të problemeve me klientët.
Shumë aplikacione për zbulimin e emocioneve, përmes Inteligjencës Artificiale fokusohen tek reagimet në grup. Për shembull, në fushën e marketingut, kjo teknologji aplikohet për të vëzhguar reagimet e njerëzve ndaj fushatave të ndryshme reklamuese.
Në vend që të fokusohen tek përdoruesit individualë, ata që punojnë në këtë sektorë kapin të gjitha këto të dhëna dhe i vlerësojnë ato për të përmirësuar fushatat reklamuese.
Ka filluar të përdoret edhe në sistemin shëndetësor për të ndihmuar mjekët dhe pacientët. Përmes teknologjisë mund të zbulohen nivelet e stresit dhe këto të dhëna i ndihmojne mjekët për t’iu shërbyer pacientëve.
Megjithatë, ka ende shumë polemika rreth emocioneve që identifikon Inteligjenca Artificiale. Ajo ka përfitimet e saj, por duhet të jemi të kujdesshëm kur shqyrtojmë aplikacionet e mundshme.
Ka disa pyetje që shtrohen: A është e drejtë të penalizohen njerëzit për ndjenjat e tyre? A është e pranueshme që kandidatët për punë të gjykohen për mënyrën se si tingëllon zëri i tyre.Të gjitha këto shqetësime do të duhet të merren parasysh përpara se Inteligjenca Artificiale të shtrihet edhe në fusha të tjera.
Klan News
