Presidenti amerikan, Donald Trump, tha se ka shtyrë vendosjen e tarifave prej 25 për qind ndaj shumicës së mallrave nga Meksika, një muaj pasi ai zhvilloi një bisedë telefonike me presidenten meksikane.
Njoftimi i Trumpit vjen pasi sekretari amerikan për Tregti, Howard Lutnick, tha se tarifat ndaj Kanadasë dhe Meksikës “me gjasë” do të shtyhen. Kjo është hera e dytë që Trump shtyn hyrjen në fuqi të tarifave, që fillimisht u prezantuan në fillim të shkurtit.
Vendimi vlen për mallrat që janë në përputhje me marrëveshjen tregtare që Trump ka negociuar me Kanadanë dhe Meksikën gjatë mandatit të tij të parë presidencial.
“Ne po punojmë shumë, së bashku, për kufirin si në aspektin e ndalimit të hyrjes të emigrantëve të paligjshëm në SHBA, po ashtu edhe në ndalimin e fentanilit”, shkroi Trump në Truth Social.
Kërcënimet e Trumpit me tarifa ndaj importit kanë trazuar tregjet financiare dhe kanë ulur besimin e konsumatorëve si dhe kanë krijuar pasiguri për shumë biznese. Lutnick tha se tarifat e ndërsjella, që SHBA-ja aplikon ndaj importeve ndaj shteteve që vendosin taksa për eksportet amerikane, do të hyjnë në fuqi më 2 prill.
Po ashtu të enjten, kryeministri kanadez, Justin Trudeau, la të kuptohet se pret që shteti i tij të jetë në një luftë tregtare me SHBA-në.
Ai tha se pezullimi njëmujor “përputhet me disa nga bisedat që kemi pasur me zyrtarët e administratës” së Trumpit.
Udhëheqësi kanadez tha se vendimi i administratës së Trumpit është “shenjë premtuese”, por gjithashtu “do të thotë se tarifat mbeten në fuqi dhe, për pasojë, përgjigja jonë do të mbetet në fuqi”./REL
