Aksionet e SPAK janë tema kryesore e këtyre ditëve, teksa është shtruar edhe pyetja nëse po shkon edhe drejt derës së kryeministrit Rama. Në diskutimin në studion e emisionit “Opinion” në Tv Klan, analisti Artan Hoxha u pyet nëse ka një ndryshim të SHBA-së në qëndrimin ndaj SPAK dhe a e ka ndier institucioni këtë ndryshim.
Sipas Hoxhës, zgjedhjet në Amerikë po sjellin mesazhe të reja. Analisti thotë se SPAK u përdor për të goditur opozitën dhe fuqizuar Ramën.
Artan Hoxha: Amerika e pas 5 nëntorit është shumë e ndryshme nga Amerika para 5 nëntorit.
Blendi Fevziu: Por SPAK-u është i njëjti.
Artan Hoxha: Amerika e pas 5 nëntorit po ndryshon me shpejtësi marramendëse në krahasim me Amerikën e para 5 nëntorit dhe Amerika e pas 5 nëntorit po kërkon të ndryshojë gjithë botën me të njëjtën valë, po flas të paktën për botën demokratike. Do të kujtojmë para ca ditësh fjalimin mjaft interesant të zëvendëspresidentit në konferencën e Mynihut që i la ata liderët neoliberalë gojëhapur, pastaj iu kundërvunë. Kemi një Amerikë të ndryshme që po përpiqet të ndryshojë edhe botën, të japë mesazhet e konservatorizmit, jo më thjesht brenda kufijve të Amerikës, por në rang global, gjë që nuk ndodhi në Amerikën e 16, 17,20-ës. Siç Amerika po emeton mesazhe për ndryshime në Europë perceptohen edhe në Shqipëri dhe Amerika ndryshe dhe mesazhet që priten të vijnë gjithnjë e më të qarta prej saj edhe për këtë copën tonë të vogël që quhet Shqipëri, po kapen edhe nga kryeministri, edhe nga gjyqësori i reformuar dhe të dy së bashku po shohin edhe ndryshimin e sjelljeve të njëri-tjetrit dhe pikërisht këtu e gjejmë shpjegimin e një dinamike të re relacionesh mes kryeministrit dhe strukturave të drejtësisë së posaçme, por edhe ca strukturave të tjera të kësaj drejtësie. Për ta thjeshtëzuar, deri para 5 nëntorit kishim një Amerikë neoliberale që për arsyet e veta kishte zgjedhur Ramën për ta mbështetur, mbështetja ishte e qartë, me lëvdata për të dhe po kështu, për të njëjtat arsye, të liberalizmit, të afiniteteve, të nevojës për të pasur një diktator që i përgjigjet asaj rryme politike në Amerikë zgjodhën të godasin ashpërsisht Berishën, Metën dhe opozitën. Ajo që nisi si reformë e drejtësisë dhe u plotësua ndër vite, u formësua në mënyrë të tillë që të përdoret për të goditur opozitën, por natyrisht për ta fuqizuar pushtetin e një lideri tip Rama të përzgjedhur…
Blendi Fevziu: Pra, ti po thua që SPAK-u u ndërtua që të përdoret…
Artan Hoxha: Pa diskutim po! Kjo po të thuhet tani edhe në SHBA. Ty të është bërë nëndrejtor i FBI një person…
Blendi Fevziu: Po pse SPAK qenka një strukturë që e përdorin njëherë për të goditur Berishën, tani kthehen të godasin Ramën? Po ne s’paskemi drejtësi!
Artan Hoxha: Ku ke pasur ndonjëherë drejtësi? Po ne s’kemi akoma mo!
Më thjesht, Hoxha shprehet se goditja e qeverisë së Ramës, përfshirë edhe arrestimin e kryetarit të bashkisë së Tiranës, Erion Veliajt, ka si qëllim shkëlqimin e pushtetit të tij.
Artan Hoxha: Sistemi i drejtësisë në Shqipëri dhe jo vetëm është ngritur për të zbatuar politikën e Amerikës së asaj kohe.
Blendi Fevziu: Hoxha, se kështu si e shtrove ti i bie që SPAK-un e bënë amerikanët ose një administratë amerikane për të vrarë, në thonjëza, kundërshtarët e Ramës dhe tani kjo administratë e re do ta përdorë për të vrarë Ramën vetë?
Artan Hoxha: Ju kam thënë në këtë studio që në SPAK-GJKKO ka dy rryma: është rryma qeveritare dhe rryma amerikane. Këto të dyja bashkëveprojnë për mrekulli për të goditur opozitën. Vjen puna për të goditur nga krahu i qeverisë, është me leje, lëshojmë këtë, japim këtë.
Blendi Fevziu: Ku e morën lejen për Veliajn për shembull se mos më thuaj që e morën në Uashington?
Artan Hoxha: Kujdes, Veliaj, për të shpjeguar fenomenin. Pse kjo drejtësi e kontrolluar bashkërisht nga Rama dhe amerikanët që e mbështesin Ramën godet te krahu i qeverisë? Pushteti nuk mund të jetë i ndritur pa pastruar te radhët e tua. Nuk mund të kesh fitore të mëdha. Edhe Veliaj është targetuar për t’u qëruar dhe për ta pastruar pushtetin e diktatorit të ndritur se sa kohë ka që po ju them, ai po e projekton vetveten në 20 vitet e ardhshme si një diktator i ndritur. I duhet edhe ndriçimi i pushtetit, jo vetëm fuqia e tij. Nuk mund ta ndriçosh, lustrosh pushtetin pa pastruar nga të tutë. Duhet të bësh sakrifica të tilla. Nuk mund të bësh një drejtësi të godasë opozitën pa ngrënë nga mishi yt. Kjo ka qenë drejtësia.
