Platformat e komunikimit “Signal” dhe “Telegram” po përdoren gjerësisht për të kryer mashtrime që kanë në shënjestër biznesmenë të njohur, duke u zhvatur shuma të mëdha parash.
Policia thotë se një nga personat e përfshirë në këtë skemë është Florian Gjergji, i shpallur në kërkim për organizimin e shtatë tentativave mashtrimi ndaj disa sipërmarrësve.
Ai u shkruan në numrat e tyre të telefonit duke u prezantuar si zyrtar i lartë apo mik i tyre dhe u kërkon shuma të mëdha parash.
Nëse bien dakord, u dërgon njerëz për të marrë paratë. Por ai nuk është i vetmi. Të paktën 7 biznesmenë kanë rënë pre e këtyre mashtrimeve.
Osman Fuçia, shef i Seksionit të Hetimit të Krimeve Kibernetike në Tiranë, shpjegon për Tv Klan se këto platforma zgjidhen për shkak të vështirësisë së gjurmimit të komunikimeve në to.
“Kryesisht përdor rrjetin ‘Telegram’ dhe ‘Signal’ pasi këto dy aplikacione janë më të lehta për t’u administruar dhe për të ndryshuar të dhënat e personave që i përdor/ Ky shtetas përdor emra të personave VIP”, tha Osman Fuçia, Shef i Seksionit të Hetimit Kibernetik.
Pjesa më e madhe e personave operojnë nga brenda Shqipërisë, por ka edhe raste kur aktiviteti i tyre zhvillohet jashtë vendit.
“Kjo lloj veprimtarie nuk njeh moshë të caktuar, por të dy personazhet janë të moshës mbi 30 vjeç, kanë aftësi të mira teknologjike sa i përket përdorimit të këtyre aplikacioneve. Autorët e kësaj kategorie vepre penale veprojnë zakonisht në Shqipëri, por edhe jashtë vendit. Jashtë vendit krijohet edhe një siguri që është pak më e vështirë sa i takon gjurmimit të kësaj kategorie vepre penale”, tha Fuçia.
Ekspertët thonë se gjurmimi i mashtruesve që përdorin platforma si “Signal” dhe “Telegram” është një proces i vështirë, pasi përdoruesit shpesh regjistrohen me numra telefoni të përkohshëm ose të rremë, që blihen online ose sigurohen nga vende të tjera, duke e vështirësuar identifikimin e tyre.
Këto aplikacione ofrojnë edhe opsionin për të mos e treguar numrin e telefonit tek të panjohurit. Shumë mashtrues operojnë nga vende jashtë juridiksionit të Shqipërisë ose në vende ku bashkëpunimi ndërkombëtar për çështje kibernetike është i kufizuar.
Kjo e bën të vështirë ndjekjen dhe arrestimin e tyre. Ata përdorin VPN për të fshehur vendndodhjen e tyre reale dhe për të krijuar gjurmë dixhitale të rreme. Policia thotë se teksa gjurmimi i rasteve vijon, qytetarët duhet të bëjnë kujdes që të verifikojnë personat me të cilët komunikojnë dhe t’i denoncojnë tentativat e mashtrimit.
Tv Klan
