Presidenti i Koresë së Jugut, Yoon Suk-yeol, ka shpallur gjendjen e jashtëzakonshme ushtarake, duke akuzuar opozitën për kontrollin e Parlamentit, simpatizim me Korenë e Veriut, paralizimin e qeverisë dhe përfshirje në “akte kundër shtetit dhe komplot për rebelim”.
Në një fjalim televiziv drejtuar kombit, Yoon e cilësoi këtë masë të domosdoshme për të mbrojtur vendin nga forcat komuniste.
“Për të ruajtur Korenë e Jugut si një shtet të lirë dhe për të eliminuar elementët anti-shtetërorë filo-veriorë që kërcënojnë lirinë e popullit tonë, shpall ligjin ushtarak emergjent,” deklaroi presidenti.
Sipas Kushtetutës, presidenti ka të drejtë të shpallë ligjin ushtarak në rast lufte ose emergjence kombëtare, por duhet ta anulojë atë nëse Asambleja Kombëtare voton për shfuqizimin e tij.
Aktualisht, Partia Demokratike, partia kryesore opozitare, mban shumicën me 170 nga 300 vende në parlament, duke e bërë të vështirë për Yoon të zbatojë politikat e tij që nga marrja e detyrës në vitin 2022.
Ligji ushtarak i jep presidentit fuqinë për të mobilizuar ushtrinë për të ruajtur rendin publik dhe për të ushtruar autoritet gjyqësor. Megjithatë, Yoon nuk dha detaje konkrete mbi masat që do të merren.
“Shpall ligjin ushtarak për të mbrojtur Republikën e Lirë të Koresë nga kërcënimet e forcave komuniste të Koresë së Veriut dhe për të çrrënjosur elementët anti-shtetërorë që po minojnë lirinë dhe lumturinë e popullit tonë,” shtoi presidenti.
Pas këtij njoftimi, Partia Demokratike thirri një mbledhje urgjente me deputetët e saj.
Sipas agjencisë koreano-jugore Yonhap, vendimi erdhi pasi Partia Demokratike miratoi një buxhet të zvogëluar në komisionin parlamentar të buxhetit dhe paraqiti një mocion për shkarkimin e kryerevizorit dhe prokurorit të përgjithshëm.
