Presidenti i Serbisë, Aleksandër Vuçiç, në konferencën urgjente për shtyp që zhvilloi sot, përveçse akuzoi Albin Kurtin se inskenoi sulmin terrorist në Zubin Potok, konfirmoi se edhe shteti i tij po kryen hetime për ngjarjen.
Në vazhdën e narrativës që ia lë fajin qeverisë në Prishtinë dhe kryeministrit Kurti, Vuçiç hodhi dyshime se eksplozivi që hodhi në erë kanalin e Ibër-Lepencit është serb dhe i sekuestruar nga Policia e Kosovës në veri pas sulmit në Banjskë.
“Kemi dyshime të caktuara, por hetimi do të konfirmojë se kush e ka dhënë urdhrin. Unë jam pothuajse i sigurt se ishte një eksploziv i prodhimit serb që është sekuestruar më parë, kështu që po ju pyes se kush e ka përdorur, nëse ai ishte tashmë i konfiskuar.”
Vuçiç gjithashtu kërcënoi se do të arrestojë çdo serb të Kosovës dhe ta ndjekë penalisht, nëse ndonjëri prej tyre ka marrë pjesë apo ka kryer sulmin terrorist.
“Ndoshta serbët janë fajtorë që u besuan shqiptarëve dhe Kurtit. Ne nuk nxjerrim konkluzione pa përfunduar hetimi, por cilido serb që është i përfshirë do të arrestohet menjëherë”, deklaroi Vuçiç.
Presidenti serb, la të kuptohet se akuzon Kurtin për inskenim të shpërthimit në kanalin Ibër Lepenc, ndërsa rreshtoi dhe pesë arsye që sipas tij, kjo ngjarje shkon në favor të kryeministrit.
Sipas tij, Kurti pas këtij akti donte të fuste ushtrinë në veri, ta shpallte Listën Serbe organizatë terroriste, do të përfitonte pikë në sondazhe para zgjedhjeve, do të dëmtonte rrugën europiane të Serbisë dhe do të vijonte shtypjen e serbëve në veri.
