Kreu i Grupit Parlamentar të PS-së, Niko Peleshi, nga Korça është pyetur në lidhje me protestën e thirrur nga opozita më 7 tetor.
Peleshi u shpreh se protesta është zgjedhje e tyre, por shtoi se nuk mund të protestohet për një vendim gjykate të formës së prerë të dhënë nga drejtësia e re e votuar nga 140 deputetë.
Në lidhje me qeverinë teknike, ai tha se opozita “kërkesat politike mund t’i formulojë sipas orekseve politike, por unë nuk shikoj se ka ndonjë arsye që të vihet në diskutim qeveria”.
“S’mund të komentoj çfarë vendos opozita, protesta është një element demokratik nuk është një erezi. Protesta e dhunshme pastaj është diçka tjetër, por unë nuk mund ta paragjykoj. Protesta është zgjedhja e tyre, kërkesat politike ata mund t’i formulojnë sipas orekseve politike të veta por unë nuk shikoj se ka ndonjë arsye që të vihet në diskutim qeveria. Për ç’arsye, për shkak të një vendimi të formës së prerë të një sistemi të pavarur nga qeveria? A po flasim pasi kemi kryer së bashku një reformë në drejtësi? E kemi votuar me 140 vota me duartrokitje. Tani të gjykojmë ne vendimet e gjykatave? Për këtë arsye të dali në protestë?”, tha Peleshi.
