Ministri i Shtetit për Marrëdhëniet me Parlamentin, Taulant Balla ka reaguar për aktet e dhunës të ndodhura në seancën e sotme plenare.
Përmes një postimi në rrjetet sociale, Balla shkruan se ky është një skenar i njohur, pasi sipas tij sa herë që Shqipëria gjendet para një momenti historik, sikurse është Konferenca e Dytë Ndërqeveritare që mbahet në 15 tetor, PD-ja bëhet e dhunshme.
Sipas Ballës, djegia e mandateve apo e karrigeve përkthehet në vota për mazhorancën në zgjedhjet e ardhshme, sepse dhuna nuk mund të tolerohet.
Postimi i plotë i Taulant Ballës:
Sa herë Shqipëria gjendet para një momenti historik, siç presim me padurim Konferencën e Dytë Ndërqeveritare pas pak ditësh në Bruksel, mes Shqipërisë dhe BE, përsëri Sali Berisha ka porositur dhunë.
“Marrëzia është bësh të njëjtin veprim vazhdimisht e të presësh rezultate të ndryshme” thoshte Ajnshtajni. Edhe me dhunën e Saliut, rezultati ka qenë gjithmonë i njëjtë. Sa më të dhunshëm bëhen, aq më të vendosur jemi ne për të ecur përpara në rrugën tonë, pasi sot kjo është e vetmja rrugë që afron Shqipërinë me Europën.
Sa më shumë dhunë prej tyre, aq më shumë vota në zgjedhjet e ardhshme për ne, sepse askush nuk voton për partinë e dhunës dhe destabilitetit, as në Shqipëri e as në diasporë. Shqipëria ka vuajtur shumë për të fituar të drejtën e fjalës së lirë dhe parlamentin e zgjedhur nga vota e lirë, dhe në respekt të tyre nuk mund të tolerohet dhuna dhe barbarizmi ndaj institucioneve demokratike.
Djegia e mandateve apo e karrigeve, ndëshkimin e ka marrë dhe do ta marrë nga populli shqiptar me votë pas pak muajsh, në pranverë.
