Të enjten në mbrëmje, në emisionin “Opinion” u diskutua tema “Përse e dënuan Ervin Salianjin me 1 vit burg?”
Ervin Salianji, deputeti i Partisë Demokratike, drejtues politik i qarkut të Elbasanit është dënuar nga gjykata e Apelit me 1 vit burg për kallëzim të rremë. Vendimi i gjykatës së Apelit merr formën e prerë dhe pritet që Salianji të fillojë dënimin e tij. Historia për të cilën Salianji u dënua lidhet me historinë e famshme të “Babales”. Çfarë po ndodh me Ervin Salianjin? Çfarë sjell dënimi i tij? Kur pritet të merret masa e ndalimit? A duhet t’i drejtohet edhe njëherë parlamentit për të marrë një miratim nga Komisioni i Mandateve përpara se policia të ekzekutojë vendimin e gjykatës së Apelit? Sa kohë e penalizon Ervin Salianjin kjo çështje? A mund të jetë ai në listën e Partisë Demokratike për deputet edhe duke qenë në burg?
Të ftuar: Klodiana Lala, Baton Haxhiu, Artan Hoxha, Ledio Braho, Armand Bajrami, Arber Hitaj
I ftuar në studion e “Opinion” ishte edhe deputeti i PD, Ervin Salianji, i cili tha se se hapja e hetimit ndaj tij, ka shmangur një dënim të ri për Geron apo Fatmir Xhafajn.
Në pjesën tjetër të emisionit ishte historia e të enjtes, një intervistë me Eleanor Monbiot. Ajo mbërriti në Shqipëri në vitin 1999 kur vetëm 11 punonjës të firmave humanitare ndodheshin në vend. Monbiot erdhi vullnetare, qëndroi dy vjet dhe mbuloi luftën e Kosovës duke qëndruar në Kukës, në kufi dhe duke ndjekur pjesën më të madhe të shqiptarëve të Kosovës që kalonin kufirin dhe duke u munduar të ndihmonte shqiptarët që i prisnin. Më pas ajo u vendos në zonën e Bathores ku punoi sistematikisht për dy vjet me komunitetin për t’i ndihmuar ata që të integroheshin. Sot është presidente e World Vision për Europën lindore dhe Lindjen e Mesme, ka mbuluar mbi 112 vende të botës në krizë, është një nga personazhet më të rëndësishëm të aksioneve humanitare dhe është rikthyer në Shqipëri pas 25 vitesh duke dhënë një intervistë ku tregon kujtimet e asaj kohe./Opinion.al
