Një ngjarje e rëndë ka ndodhur mëngjesin e sotëm në qytetin e Sarandës.
Një 69-vjeçar dyshohet se ka vrarë gruan e tij me sëpatë dhe pas kësaj ngjarje është konfliktuar me të birin, ku ky i fundit e ka hedhur nga shkallët e për pasojë i moshuari ka humbur jetën.
Ndërkohë uniformat blu kanë shoqëruar në komisariat djalin e tyre 40 vjeç.
“Sarandë/Informacion paraprak
Rreth orës 07:00, në fshatin Shalës, Konispol, dyshohet se gjatë një konflikti për motive të dobëta, në banesë, shtetasi H. I., 69 vjeç, ka vrarë me mjet prerës (dyshohet sëpatë) bashkëshorten e tij, shtetasen Sh. I., 66 vjeçe.
Më pas, shtetasi H. I. dyshohet se është konfliktuar me djalin e tij, shtetasin K. I., rreth 40 vjeç, i cili e ka shtyrë shtetasin H. I. nga shkallët e banesës. Si pasojë e dëmtimeve, shtetasi H. I. ka humbur jetën në vendngjarje.
Shërbimet e Stacionit të Policisë Konispol, pas njoftimit të marrë, kanë shkuar menjëherë në vendngjarje ku kanë bërë të mundur kapjen dhe shoqërimin në ambientet e Policisë të autorit të dyshuar, shtetasit K. I.”, njofton policia.
Grupi hetimor ndodhet në vendngjarje dhe, nën drejtimin e Prokurorisë, po punon për sqarimin e plotë të rrethanave të ngjarjes.
