Deputeti i PD-së, Oerd Bylykbashi foli për reformën zgjedhore, duke theksuar se drafti i propozuar prej PD është më i plotë dhe më i gjerë se ai i mazhorancës.
Në një dalje për mediat, ai tha se synohet që të votojnë jo vetëm emigrantët, por të gjithë shqiptarët që për arsye të ndryshme ndodhen jashtë vendit në momentin kur zhvillohen zgjedhjet.
“PD dhe opozita kanë bërë propozimin për votën nga jashtë Shqipërisë. Ne u përballën me mazhorancën me këtë draft tonin që është më i gjerë. Të gjithë shtetasit shqiptarë duhet të kenë të drejtën për të votuar nëse ata ndodhen jashtë Shqipërisë. Ata që janë emigrant dhe kanë një adresë, ata që janë për arsye pune, studentët, ushtarakët, të gjithë këta të kenë mundësinë që të regjistrohen pa pengese në KQZ me dokument të qartë që shërben vetëm për ato zgjedhje dhe nuk ka ndikim për aspekte të tjera. Patëm një debat dhe diskutim të gjatë, u lanë detyra të tjera për të qartësuar detajet e fundit. Por gjykoj që do të ecet përpara. Votimi nga jashtë, jo vetëm diaspora, por të gjithë shqiptarët që kanë të drejtën kushtetuese të votojnë. Kemi ecur në diskutime dhe detaje teknike. Ajo që është e rëndësishme është që kjo të jetë e drejtë efektive. Ne u përpoqëm të imponojnë këtë. Nuk mund të ketë dy kategori shqiptarësh, ata që janë regjistruar në mënyrë të ligjshme dhe ata që janë regjistruar në mënyrë të paligjshme, kushdo që është jashtë Shqipërisë dhe ka një dokumentacion dhe adresë që mund të komunikojnë do kenë të drejtën e votës”, tha Bylykbashi.
