Italia e mbylli Euro 2024 ditën e djeshme, pas humbjes 2-0 ndaj Zvicrës.
Italia u eliminua nga Europiani, por drejtuesit e Federatës kanë vendosur ti besojnë Luçiano Spaletit deri në Kupën e Botës.
Lajmi është bërë i ditur nga eksperti i merkatos, Fabricio Romano. Këtë të diel, presidenti i Federatës italiane të Futbollit (FIGC), Gabriele Gravina foli për mediat, duke konfirmuar në stolin e kombëtares së kaltër ish-trajnerin e Napolit.
“Nuk kemi asgjë për të fshehur, por duhet të vazhdojmë të marrim përgjegjësi. Ne kemi nevojë për një ndjenjë të tillë.
Pas ndeshjes zhvilluam një bisedë të gjatë me trajnerin. Mendoj se është e paimagjinueshme të zgjidhen problemet duke braktisur një projekt shumëvjeçar.
Nuk mund të braktisim këtë që kemi nisur vetëm para 8 apo 9 muajsh. Dhe nuk duhet të harrojmë se Spalletti ka drejtuar kombëtaren në vetëm 10 ndeshje…
Gjithashtu nuk duhet të harrojmë se kjo kohë nuk është e mjaftueshme. Spalletti nuk e ka patur grupin gjithmonë të plotë. Unë ju them me bindje se ky është një eliminim që dhemb.
Por duhet të jetë një reflektim për të ardhmen. Dhe besimi ynë është i plotë me shpresën se gjithçka do të funksionojë.
Tashmë duhet të mendojmë për të ardhmen, sepse pas 60 ditësh do të kemi sfida të reja”, tha ndër të tjera në fjalët e tij kreu i futbollit italian.
