Të enjten, më 13 qershor 2024 u transmetua i fundit i vitit të 27-të të “Opinion” dhe do të rikthehet në muajin shtator.
Mbrëmjen e të enjtes tema e trajtuar ishte “Gjithçka për Shqipërinë në Euro 2024!”.
Programi i kushtohet prezantimit të Shqipërisë në Euro 2024. Për të dytën herë, Shqipëria do të jetë e pranishme në kampionatin europian të futbollit. Këtë herë shkon si e para e grupit, një surprizë e rrallë. Fokus te çfarë po ndodh në Gjermani, situata e ekipit, rruga e përshkuar, pasionet dhe komentet e të ftuarve. Të ftuar: Suela Demiri, Balina Bodinaku, Lenida Halilaj, Fioralba Dizdari, Roberta Zaninoni, Faruk Sejdini, Ervin Salianji, Taulant Balla, Fabrizio Bucci, Alvaro Renedo Zalba
Në lidhje Skype: Albana Murra, Mariela Berliku
Në pjesën e fundit të emisionit ishte historitë e të enjtes. 3 muaj më parë në një reportazh për urën e Kukësit të vendosur mbi lumin Drin, projektuesit e saj, kompanitë Salillari dhe Kastrati i premtuan gazetarit Blendi Fevziu se do të ishte personi i parë që do të kalonte mbi të me automjetin e parë që do të bënte kalimin. Premtimi u realizua ndërsa testimi i urës do të bëhet në këto ditë me 25 kamionë që do të kalojnë mbi të për t’i dhënë të gjithë tonalitetin. Ura është projektuar nga një kompani e rëndësishme italiane. Giorgio Risi ka zhvilluar një intervistë me gazetarin Blendi Fevziu. Gjatësia e urës është 320 metra dhe ka harkun më të lartë në Ballkan dhe ndër më të lartat në Europë. Ajo peshon thuajse 7000 ton. Ura do të hapet në fund të muajit qershor.
