Një përleshje fizike ka shpërthyer në parlamentin gjeorgjian të hënën pasi partia në pushtet hartoi një projekt-ligj të diskutueshëm për “agjentët e huaj” që është kritikuar nga vendet perëndimore.
Mamuka Mdinaradze, kreu i fraksionit parlamentar të partisë qeverisëse “Ëndrra Gjeorgjiane” u godit me grusht në fytyrë nga Aleko Elisashvili, një deputet i opozitës, ndërsa fliste nga foltorja.
Pamjet e transmetuara në televizionin gjeorgjian, kapën momentin kur deputeti u godit, gjë që çoi në një përplasje fizike më të gjerë.
Përleshje të tilla nuk janë të rralla në parlamentin shpesh të ashpër të Gjeorgjisë, ku pati gjithashtu një përleshje mbi projektligjin në mars.
“Ëndrra Gjeorgjiane” tha në fillim të këtij muaji se do të rifusë legjislacionin që kërkon që organizatat që pranojnë fonde nga jashtë të regjistrohen si agjentë të huaj ose do të përballen me gjoba, 13 muaj pasi protestat e detyruan atë të anulojë planin.
Projektligji është kritikuar nga vendet evropiane dhe Shtetet e Bashkuara. Bashkimi Evropian, i cili i dha Gjeorgjisë statusin e kandidatit në dhjetor 2023, ka thënë se masa është e papajtueshme me vlerat e bllokut.
Kritikët e kanë krahasuar atë me një ligj rus të vitit 2012, i cili është zgjeruar në mënyrë të qëndrueshme që atëherë dhe është përdorur për të goditur shoqërinë civile ruse dhe mediat e pavarura./Opinion.al
