Mediat greke vijojnë të publikojnë detaje në lidhje me vrasjen e 41-vjeçares shqiptare shtatzënë në Greqi.
Dyshohet se autor i ekzekutimit të Xhorxhia Muratit është bashkëshorti i saj grek, 39-vjeçar, i cili është ndihmuar në kryerjen e krimit dhe nga shoku i tij 34-vjeçar.
Ndërkaq, në dëshminë e dhënë përpara autoriteteve 39-vjeçari ka mohuar që të jetë ai personi që shihet në pamjet e kamerave të sigurisë dhe që ka vrarë bashkëshorten e tij.
Por shoku i tij pranon se 39-vjeçari, e kishte kontaktuar ta ndihmonte me inskenimin e një grabitjeje.
“Unë isha aty për ta ndaluar sepse pranova ofertën e tij për të bërë një grabitje të rreme pa u lënduar vajza. Kur mori thikën në duar, më kërkoi të largohesha. Dola nga pallati dhe prita në makinë. Pastaj erdhi dhe më tha se e kishte vrarë. Unë pranova ta lëviz trupin sepse kisha frikë se mos e pësoja të njëjtën gjë”, mësohet se ka thënë ndër të tjera ai në hetuesi.
Por, partneri i Xhorxhias këmbëngul se nuk ishte ai i përfshirë në vrasje dhe se ishte në gjumë atë natë.
“Gjeorgjia ishte i vetmi person që kisha në botë. Nuk do të pranoj diçka që nuk e kam bërë. Atë natë mora 3 pilula gjumi dhe nuk kam kuptuar asgjë, të nesërmen u zgjova në mëngjes. Nuk jam ai që përshkruhet në video-t e publikuara,” ka thënë ai.
