Në një konferencë për mediat të zhvilluar këtë të enjte, ministri i Brendshëm, Taulant Balla, u pyet për komunikimin që pati dje ish-kryeministri Berisha me mbështetësit e tij duke thyer masën e arrestit të shtëpisë.
Teksa tha se nuk do të donte t’i jepte ngjyrim politik kësaj çështjeje, Blla nënvizoi se Kodi i Procedurës Penale, është i qartë për mënyrën e zbatimit të arrestit në shtëpi. Sipas tij, kodi thotë se gjatë arrestit në shtëpi ke të gjitha ndalimet që ke edhe gjatë arrestit me burg.
“Unë nuk dua kurrsesi që kësaj çështjeje t’i jap cdo lloj perceptimi apo ngjyrimi politik. Për ne të gjitha rastet janë raste që këta persona i kanë më drejtësinë pavarësisht faktit që në rastin e Berishës është një kallëzim i bërë nga ana ime në cilësinë e deputetit dhe një qytetari të njohur me një vepër penale. E kam ndjekur atë çështje prej shumë vitesh që kur gatuhej ajo formë privatizimi dhe pastaj të gjitha veprat që kanë pasuar. Mbetem i bindur se rasti i privatizimit të Partizanit është një rast tipik si në librat e kriminalistikës të korrupsionit. S’dua të hyj në asnjë lloj komenti. Sot në Shqipëri përballen dy botë, keni PS, grupin e saj parlamentar që nuk bën asnjë koment për asnjë akuzë që ngrihet ndaj njërit prej nesh dhe ndërkohë në rastin tjetër që besoj se e dini, se është një korrupsion i pastër. Një funksionar publik përdor firmën, pozicionin e tij dhe funksionarërt e tij për përfitimet e paligjshme.
Lidhur me pyetjen e parë dua të them se Kodi i Procedurës Penale, neni 237 pika 4 është i qartë për mënyrën e zbatimit të arrestit në shtëpi. Kodi thotë se gjatë arrestit në shtëpi ke të gjitha ndalimet që ke edhe gjatë arrestit me burg. Nuk e kam shkruar unë, as zotëria por e kam votuar edhe unë edhe zotëria. Këtu është ndarja e dy botëve, sa e respekton ligjin. Nuk do të hyj në asnjë koment. Nuk kam pasur asnjë kontakt me policinë sa i përket detyrës së policisë që shtetasi në fjalë të trajtohet një lloj si cdo qytetar….Të gjitha konstatimet që ata bëjnë gjatë zbatimit të këtij vendimi të gjykatës dhe urdhërit që ka nxjerrë prokuroria për rastin. Është e papranueshme por I takon institucioneve të tjera të bëjnë komente për këtë.”, tha Balla.
