Në një konferencë të zhvilluar këtë të mërkurë me gazetarët, ish-kryeministri Sali Berisha ka hedhur sërish akuza për gjyqtaren Irena Gjoka, e cila po gjykon çështjen ndaj tij për privatizimin e ish-kompleksit “Partizani”.
Teksa e akuzoi se është në shërbim të kryeministrit Rama, Berisha tha se gjyqtarja Gjoka duhet të deklarojë nëse është shkarkuar nga ish-kryeministri në 1996 për shkelje të rëndë të ligjit dhe korrupsion.
“Gjykatësja, turpi i drejtësisë, nuk duhet të fshihet prapa krimit të saj, por duhet para krimi por të deklarojë në emër të detyrimit ligjor, është shkarkuar apo jo nga Sali Berisha në 1996, për shkelje të rëndë ligji dhe korrupsion. Të dalë dhe të deklarojë. Turpi i njeriut. U tha avokatëve se nuk më sollët prova që unë jam shkarkuar. Nuk ka ndërgjegje ajo. Arkivë në ndërgjegjen e saj nuk ekziston. Tani mbahet me premtim që i ka dhënë Ramës për masën që ka marrë. Gjithë jetën time ata që kanë punuar me mua, porosia më konstante që u kam dhënë ka qenë mos të pranojnë urdhra kundër ligjit. Një qenie që fshihet prapa krimit të saj dhe shkelmon kushtetutën, nuk e pranoj kurrë një gjë të tillë. Ajo s’është asgjë tjetër veçse një skllave mjerane në shërbim të Edi Ramës”, tha Berisha.
