“Finalmente Elsa” do të titullohet koncerti i parë recital i artistes së mirënjohur shqiptare, Elsa Lila, tek i cili këngëtarja thotë se do të këndohen shumë këngë që e kanë shoqëruar përgjatë viteve të karrierës.
E ftuar në emisionin “Opinion” në Tv Klan, artisja Elsa Lila është shprehur se në koncertin recital do të jenë instrumentistët më të mirë italianë, si dhe ka zbuluar që skenën do të ndajë me artistin Pirro Çako në këndimin e këngës “Diferenca je ti”.
Këngëtarja Elsa Lila ka treguar dhe planet e së ardhmes, të cilat i sheh në kontakt më të afërt me natyrën, larg zhurmës dhe trafikut, ku të jetë më në kontakt me vetveten.
Blendi Fevziu: Si e shihni të ardhmen tuaj, a e shihni të ardhmen tuaj tek muzika?
Elsa Lila: Unë jam rritur me muzikën, është jeta ime. Edhe përpara se të filloja të merresha me muzikë duke qenë se babai im është tenor. Besoj se deri kur të kem jetë, do të vazhdoj të merrem me muzikë, do të jetë dimension i jetës time. Muzika është dominantja, por më pëlqen zdruktharia, di të ndërtoj objekte të ndryshme.
Blendi Fevziu: Çfarë prodhon?
Elsa Lila: Komodina, stola, karrige. Më pëlqen që nga imagjinata, ashtu edhe me materiale të ricikluara. Më pëlqen kopshtaria, kam shumë bimë në tarracën time. Më pëlqen natyra, qetësia dhe jo zhurma. Mendoj se pasi Evita të mbushë 18 vjeçe, do të tërhiqem në natyrë ku mund të prodhoj muzikë më të mirë sepse jam më në kontakt me vetveten.
Blendi Fevziu: Cilët do të jenë së bashku me ju në recital?
Elsa Lila: Do të jenë instumentistët më të mirë italianë të muzikës, janë 7 elementë të bandës, çdo gjë do të jetë live dhe jam shumë e lumtur që do të kem mundësinë të punoj me këta instumentistë që janë shumë fantastikë, çdo gjë e japin prej vetes. Nuk mund të mos këndoja “Diferenca je ti” dhe Pirro u tregua shumë xhentil dhe pranoi ftesën time dhe do të jetë i pranishëm. Pas vitit 2007 do të këndojmë së bashku “Diferenca je ti”./tvklan.al
