Zyrtarët izraelitë u zemëruan për komentin e Sekretarit të Përgjithshëm të OKB-së Antonio Guterres se sulmi vdekjeprurës i Hamasit në Izraelin jugor “nuk ndodhi në vakum”, duke e quajtur atë justifikim për terrorizmin.
Ministri i Jashtëm Eli Cohen anuloi një takim të planifikuar me Guterres ndërsa Yad Vashem, memoriali i Holokaustit të Izraelit, tha se shefi i OKB-së “dështoi në test”.
“Nuk do të takohem me Sekretarin e Përgjithshëm të OKB-së. Pas masakrës së 7 tetorit nuk ka vend për një qasje të ekuilibruar. Hamasi duhet të fshihet nga faqja e planetit!”, tha Cohen.
I dërguari i Izraelit në OKB Gilad Erdan bëri thirrje për dorëheqjen e tij, duke thënë se Izraeli duhet të rimendojë marrëdhëniet e tij me organizmin botëror.
“Ne do të refuzojmë t’u japim viza përfaqësuesve të OKB-së. Ne tashmë kemi refuzuar t’ia japim një të tillë Nënsekretarit të Përgjithshëm për Çështjet Humanitare, Martin Griffiths, “tha Erdan duke akuzuar Guterres se justifikon një masakër. “Është koha për t’u dhënë atyre një mësim.”
Izraeli historikisht ka pasur marrëdhënie të tensionuara me OKB-në, duke e akuzuar atë për njëanshmëri ndaj saj.
Të martën, Guterres iu drejtua një takimi të posaçëm të Këshillit të Sigurimit mbi luftën Izrael-Hamas që u ndez nga sulmi i grupit militant të 7 tetorit, i cili la të paktën 1,400 izraelitë të vdekur dhe më shumë se 220 të marrë peng.
Sulmet ajrore izraelite kanë shkatërruar pjesë të mëdha të enklavës së Gazës, duke lënë të vrarë të paktën 6,500 palestinezë, duke përfshirë mbi 2,700 fëmijë, sipas Ministrisë së Shëndetësisë të drejtuar nga Hamasi./Opinion.al
