Prokuroria e Posaçme, ka dërguar në gjyq, çështjen në ngarkim të dy oficerëve të policisë gjyqësore në Elbasan, sekserit dhe shefit të klubit sportiv të bashkisë së Gramshit.
Në përfundim të hetimeve të këtij procedimi penal ka rezultuar se shtetasit Lirian Taragjini dhe Zenel Taragjini, në bashkëpunim me njeri tjetrin, i kanë dhënë rryshfet 50.000 dhe 150.000 lekë të reja, oficerit të policisë gjyqësore pranë Komisariatit të Policisë Gramsh, Çelnik Toska dhe shefit të Klubit Sportiv të Bashkisë Gramsh, Lulzim Hasa për nxjerrjen e një në automjeti të sekuestruar.
Kurse i pandehuri Sefer Shuka në funksionin e Oficer i Policisë Gjyqësore pranë Drejtorisë Vendore Elbasan ka konsumuar veprën penale të “Shpërdorimit të detyrës”, pasi nuk ka marrë kallëzimin si dhe nuk ka referuar faktin penal të denoncuar nga shtetasi Lirian Taragjini.
Në njoftim bëhet me dije se janë dërguar në gjyq:
Çelnik Toska , me detyrë oficer i policisë gjyqësore pranë Komisariatit të Policisë Gramsh), akuzuar për kryerjen e veprës penale “Korrupsioni pasiv i gjyqtarëve, prokurorëve dhe funksionarëve të tjerë të organeve të drejtësisë”.
Lulzim Hasa, me detyrë shef i Klubit Sportiv të Bashkisë Gramsh, akuzuar për kryerjen e veprës penale “Ushtrimi i ndikimit të paligjshëm ndaj personave që ushtrojnë funksione publike”.
Sefer Shuka , me detyrë oficer i policisë gjyqësore pranë Drejtorisë Vendore të Policisë Elbasan), akuzuar për kryerjen e veprës penale “Shpërdorimi i detyrës ”.
Lirian Taragjini, ( i vetëpunësuar ), akuzuar për kryerjen e veprës penale “Korrupsioni aktiv i gjyqtarëve, prokurorëve dhe funksionarëve të tjerë të organeve të drejtësisë”, e kryer në bashkëpunim, parashikuar nga neni 319 e 25 i Kodit Penal dhe “Ushtrimi i ndikimit të paligjshëm ndaj personave që ushtrojnë funksione publike”, e kryer në bashkëpunim, e parashikuar nga neni 245/1, paragrafi i dytë dhe 25 i Kodit Penal;
Zenel Taragjini, akuzuar për kryerjen e veprës penale “Korrupsioni aktiv i gjyqtarëve, prokurorëve dhe funksionarëve të tjerë të organeve të drejtësisë”, e kryer në bashkëpunim parashikuar nga neni 319 e 25 i Kodit Penal dhe “Ushtrimi i ndikimit të paligjshëm ndaj personave që ushtrojnë funksione publike”, e kryer në bashkëpunim, e parashikuar nga neni 245/1, paragrafi i dytë dhe 25 i Kodit Penal.
