Konsensusi i arritur me mes grupit parlamentar të PD me atë të PS në Konferencën e Kryetarëve për rezolutën që dënon sulmin e 24 shtatorit në veri të Kosovës, ka sill përplasje në distancë të deputetëve demokrat.
Dashnor Sula i është përgjigjur Kreshnik Çollakut, i cili më herët deklaroi se kjo rezolutë është një “aleancë heshtje” mes PD së drejtuar nga Berisha dhe PS në dëm të Kosovës.
Nëpërmjet një postimi në rrjetet sociale, Sula thotë se reagimet që bëjnë deputetët që mbështesin Lulzim Bashën kanë vetëm për qëllim që të tregojnë se edhe ata ekzistojnë.
Sipas tij, Basha pati kohë të dorëzonte propozimet e tij, por nuk e bëri një gjë të tillë. Gjithashtu, Sula sill në vëmendjen dhe se javën e shkuar Basha kërkonte që Kuvendi të miratonte rezolutën që u iniciua nga Gazment Bardhi, ndërsa tashmë e kundërshton.
Postimi i Dashnor Sulës
KOSOVA NUK MUND TË PËRDORET PËR LOJË POLITIKE TË DITËS!
Prej 2 javëve në Kuvendin e Shqipërisë janë depozituar dy draft Rezoluta nga grupet parlamentare të PD dhe PS. Palët gjetën dakordësi sot për të dalë me një qëndrim të përbashkët, që në fakt është qëndrimi i institucioneve të Kosovës.
Kushdo që për “politikë të ditës” sillet sikur e do Kosovën më shumë se vetë Kuvendi i Kosovës, nëse kishte çështje apo propozime, ishte i lutur të paraqiste Amendamente, sic Rregullorja e Kuvendit e parashikon. Shënimet në facebook nuk janë as punë dhe as ndihmë për çështjen e Kosovës.
Kur flitet për Kosovën, sulmi ndaj kolegëve, për politikë të ditës, nuk nderon askënd. Përkundrazi, i përshfaq në sytë e opinionit publik si qesharakë që kanë humbur rrugën dhe nuk dinë ende se çfarë duan dhe për çfarë flasin. Një javë më parë në seancë plenare “Lideri i tyre” thërriste miratoni Rezolutën e Kosovës, sot fshihet dhe bërtet pse po miratoni Rezolutën e Kosovës.
Drafti i dakordësuar është unifikim i qëndrimit të Republikës së Shqipërisë me qëndrimin e Republikës së Kosovës. Mbështetja e qëndrimeve të Kosovës është e vetmja rrugë për të qenë sot krah saj! Të tjerat janë “politikë dite”për t’u shfaqur që ekzistojnë!
