Policia e Vlorës ka arrestuar pronarin e lokalit të natës në Sarandë, ku një muaj më parë humbi jetën kamarieri 17-vjeçar.
37-vjeçari Spiro Iljadhi u shpall në kërkim pas tragjedisë dhe këtë të mërkurë, u kap në pikën kufitare të Qafë Thanës. Gjykata e Sarandë ka caktuar ndaj tij masën e sigurisë “Arrest në burg”, për veprën penale “Shkelja e rregullave të mbrojtjes në punë”.
Në pranga është vënë edhe Lulëzim Allkushi, si personi përgjegjës për montimin e ashensorit të lokalit.
Kujtojmë se më 26 gusht, Antonio Delilaj humbi jetën, pasi u zu poshtë nga ashensori i lokalit ku punonte si ndihmës kamarier.
“Kapet dhe vihet në pranga pronari i lokalit ku një muaj më parë, për shkak të këputjes së kavos së ashensorit, humbi jetën një 17-vjeçar i punësuar në këtë lokal.
Shërbimet e Stacionit të Policisë Kufitare Qafë Botë, si rezultat i kontrolleve të shtuara për goditjen e krimeve kufitare dhe kapjen e shtetasve në kërkim, kanë kapur dhe ndaluar shtetasin në kërkim S. I., 37 vjeç, banues në Sarandë.
Gjykata e Shkallës së Parë e Juridiksionit të Përgjithshëm Sarandë ka caktuar ndaj këtij shtetasi, masën e sigurisë “Arrest në burg”, për veprën penale “Shkelja e rregullave të mbrojtjes në punë”, pasi më datë 26.08.2023, në lokalin në pronësi të tij, për shkak të këputjes së kavos së ashensorit, humbi jetën një 17-vjeçar i punësuar në këtë lokal.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Sarandë, për veprime të mëtejshme”, njofton policia./Opinion.al
