Japonia tha të martën se do të fillojë të lëshojë më 24 gusht në det më shumë se 1 milion tonë ujë radioaktiv të trajtuar nga termocentrali bërthamor i shkatërruar në Fukushima. Ky plan i saj është kritikuar rëndë nga Kina.
Plani, i miratuar dy vjet më parë nga qeveria japoneze si vendimtar për çmontimin e centralit të operuar nga Tokyo Electric Poëer Company, është përballur gjithashtu me kritika nga grupet lokale të peshkimit.
“Pres që lëshimi i ujit të fillojë më 24 gusht, nëse kushtet atmosferike e lejojnë”, tha kryeministri Fumio Kishida.
Njoftimi vjen një ditë pasi qeveria tha se kishte fituar “një shkallë mirëkuptimi” nga industria e peshkimit për lëshimin e ujit në Oqeanin Paqësor, edhe pse grupet e peshkimit thanë se ende kishin frikë se dëmtimi i reputacionit do të shkatërronte jetesën e tyre.
Uji do të lëshohet fillimisht në pjesë më të vogla me shkarkimin e parë në 7800 metra kub në rreth 17 ditë duke filluar nga e enjtja, tha Tepco.
Uji do të përmbajë rreth 190 bekerel tritium për litër, nën kufirin e vendosur nga Organizata Botërore e Shëndetësisë. Një bekerel është një njësi e radioaktivitetit.
Japonia ka thënë se lëshimi i ujit është i sigurt. Agjencia Ndërkombëtare e Energjisë Atomike (IAEA), mbikëqyrësi bërthamor i OKB-së, i dha dritën jeshile planit në korrik, duke thënë se ai përmbushte standardet ndërkombëtare dhe se ndikimi që do të kishte tek njerëzit dhe mjedisi ishte “i papërfillshëm”./Opinion.al
