Gjatë një konference për mediat nga Maqedonia e Veriut, kryeministri Edi Rama i pyetur nga gazetarët foli edhe për nismën “Ballkani i Hapur”.
Rama tha se edhe po të rikthehej sërish do ta ribënte këtë nismë, ndërsa theksoi se “Ballkani i Hapur” nuk ishte nismë përjashtuese.
Gazetari: A morët mësim nga iniciativa e Ballkanit të Hapur duke përjashtuar Kosovën dhe bëjmë vëllazëri me të dikurshmit hasëm?
Edi Rama: Pyetjen e bën sikur kam bërë një faj dhe kam nxjerrë një mësim. Ballkanin e Hapur 1000 herë të kthehesha pas 1000 herë do ta ribëja, Ballkani i Hapur nuk është nisëm përjashtuese.
Çfarë të keqe i ka sjellë Ballkani i Hapur rajonit? Përveç të mirave, shikoni shifrat.
Çfarë është bërë nuk zhbëhet. Nuk e kuptoj fare se si ka akoma dyshime për këtë kur faktet flasin qartë. Sa i përket asaj të vëllazërisë apo gjakderdhjes, mendoj që është rruga më e gabuar e mendimit shqiptar sot. Nuk ka rrugë më të gabuar se sa të vazhdojmë të rrimë në të shkuarën dhe të anatemojmë, të akuzojmë njeri-tjetrin, të grindemi me njeri-tjetrin se cili është patriot i vërtetë. Patriot i vërtetë është ai që e do vendin e vet dhe nuk i do të keqen asnjë vendi tjetër.
Për konkretisht për pjesën që ka të bëjë me Kosovën, do flasim në Kosovë.
