Një gjykatës federal i SHBA-së të martën kufizoi disa agjenci dhe zyrtarë të administratës së presidentit Joe Biden që të limitojnë komunikimet me kompanitë e mediave sociale.
Urdhri erdhi si përgjigje ndaj një padie të ngritur nga prokurorët e përgjithshëm republikanë në Luiziana dhe Misuri, të cilët pretenduan se zyrtarët e qeverisë amerikane shkuan shumë larg në përpjekjet për të inkurajuar kompanitë e mediave sociale për të adresuar postimet që ata shqetësoheshin se mund të kontribuonin në hezitimin ndaj vaksinave gjatë pandemisë COVID-19.
Vendimi thoshte se agjencitë qeveritare si Departamenti i Shëndetësisë dhe Burimeve Njerëzore dhe FBI nuk mund të bisedonin me kompanitë e mediave sociale me “qëllim të nxitjes, inkurajimit, presionit ose në çfarëdo mënyre heqjen, fshirjen, shtypjen ose reduktimin e përmbajtjes”, që cënon fjalën e lirë” sipas klauzolës së fjalës së lirë të Amendamentit të Parë të Kushtetutës së Shteteve të Bashkuara.
Një zyrtar i Shtëpisë së Bardhë tha se Departamenti i Drejtësisë po shqyrtonte urdhrin dhe do të vlerësonte opsionet e tij.
Procesi gjyqësor fillimisht u ngrit nga ish-Prokurori i Përgjithshëm i Misurit, Eric Schmitt dhe Prokurori i Përgjithshëm i Luizianës, Jeff Landry. Schmitt, i cili u zgjodh në Senatin e SHBA në nëntor, përdori Twitter-in për të mirëpritur urdhrin dhe e quajti atë një fitore të fjalës së lirë.
Urdhri përmendi gjithashtu me emra zyrtarë duke përfshirë Sekretarin e Departamentit të Sigurisë Kombëtare Alejandro Mayorkas dhe Jen Easterly, e cila drejton Agjencinë e Sigurisë Kibernetike dhe Sigurisë së Infrastrukturës, në kufizimet e saj.
Gjykatësi Terry Doughty, në një urdhër të paraqitur në Gjykatën e Qarkut të SHBA për Distriktin Perëndimor të Luizianës, bëri disa përjashtime për komunikimet midis zyrtarëve qeveritarë dhe kompanive, duke përfshirë paralajmërimin për rreziqet për sigurinë kombëtare dhe për aktivitetin kriminal.
