Teksa procesi i votimit ka nisur në orën 7:00 të mëngjesit të sotëm, në disa qendra votimi në bashkitë e vendit ka patur vonesa për shkak të mos funksionimit të pajisjeve të identifikimit elektronik, ndërkohë që në disa të tjera ka probleme me paraqitjen e komisionerëve.
Raportohet për problematika në Vlorë, Fier, Berat, Elbasan, Korçë, por edhe në Tiranë.
Disa qendra votimi në Vlorë kanë probleme me pajisjet elektronike. Nëse nuk punon sistemi pritet të filloj manualisht.
Në Pogradec janë hapur të gjitha qendrat por 15 prej tyre nuk po aktivizojnë dot pajisjet elektronike për nisjen e procesit.
Në KZAZ nr.65 në Berat, në QV 3270/00 votimi nisi me 35 minuta vonesë. Shkak u bë mungesa e komisioneres së PD, Mimoza Prifti. Komisionerja u zëvendësua.
Probleme pati edhe në qarkun e Dibrës, në qendrën 1101 në Mqellare nuk ka proces verbal e QV.
Në Kastriot një Qendër Votimi s’ka energji. Në 3-4 QV nga 99 në total nuk punojnë pajisjet e identifikimit biometrik.
Ndërkohë edhe në 4 Qendra e Votimit në Korçë s’punon pajisja e ID. Në 15 qendra votimi të fshatrave ka probleme me pajisjet elektronike, po kështu probleme janë hasur edhe në 11 qendra votimi në Devoll.
Ndërkaq në Sarandë, Finiq, Delvinë dhe Selenicë nuk ka nisur votimi që prej orës 7. Kjo ka ndodhur për shkak të problemeve me komisionerët pasi nuk janë paraqitur.
Probleme me pajisjen e identifikimit biometrik ka pasur dhe në qarkun e Fierit.
