“Nuk shihja më asgjë, kisha djallin në tru”, kështu është shprehur 45-vjeçari Taulant Malaj përballë prokurorit.
Sipas raportimeve të bukëpjekësit, në ditët para vrasjes së dyfishtë tema e diskutimeve ka qenë gjithmonë ajo e tradhtisë së Teftës.
Taulanti i shpjegon prokurorit: “E gjeta disa herë në katin e tretë të pallatit ku banonte De Santis”.
Të dielën kanë debatuar sërish dhe Malaj ka mbyllur diskutimin duke i thënë se dëshiron të ndahet. Por gruaja e tij e bindi atë të qëndrojë në shtëpi.
“Gruaja ime e kishte pranuar tashmë se kishte një lidhje me Massimo. Ajo më kishte kërkuar falje, por unë doja të ndahesha. Të shtunën mbrëma ishim në shtrat, ajo po bisedonte me dikë. Vura re se ajo po shkëmbente mesazhe me Massimon. Nuk e kam parë më. Zbrita në sallën e ndërtesës dhe prita që Massimo të shkonte në shtëpi pasi të mbyllte lokalin. Kur e pashë në pallat, u ngjita dhe e vrava”, thotë Malaj.
Më pas ai është kthyer në banesën e tij ku ka goditur me thikë gruan dhe vajzën e tij që është përpjekur të ndërhyjë. Ndërkohë djali 5-vjeçar i tmerruar ka qenë i fshehur pas divanit dhe aty e kanë gjetur dajat, të parët që hynë në banesë. Pikërisht atyre u është besuar tani.
Avokati Michele Maiellaro, i cili me kolegun e tij Giacomo Lattanzio mbrojnë Malajn, thonë se e njohin prej vitesh bukëpjekësin.
“Më vinte për pyetje administrative. Ai vinte në studio me gruan dhe Xhesikën, më është dukur gjithmonë si njeri i butë, natën punonte në furrë, kjo që ndodhi është e pashpjegueshme për mua”, thotë avokati.
Sipas autoriteteve, pyetja e parë që Malaj i bëri avokatit të tij ishte:
“Si është Xhesika? Ajo është mirë? “, të njëjtën pyetje i drejtoi me këmbëngulje edhe prokurorit që e mori në pyetje.
Avokatët flasin për “një lidhje të fortë mes autorit dhe fëmijëve të tij”, por sipas hetuesve ka të ngjarë që burri të ketë dashur të vrasë edhe fëmijën tjetër.
Kjo gjë dyshohet nga fjalët e thëna në videon e tmerrshme që burri ka xhiruar teksa ishte ende pranë kufomave, duke u kujdesur më pas për ta shpërndarë me WhatsApp tek disa miq.
45-vjeçari ndodhet në burg në Foggia i akuzuar për vrasje të dyfishtë dhe plagosje të bashkëshortes.
Malaj kishte njëzet vjet në Itali, u martua me Teftën në vitin 2006 dhe dy fëmijët lindën në Itali. Ai punonte natën. Mes tij dhe Teftës, raportojnë fqinjët, nuk ka pasur asnjëherë grindje veçanërisht të ashpra, por pakënaqësia kishte kohë që kishte nisur mes të dyve./Opinion.al
