Kreu i Partisë së Lirisë, Ilir Meta në një konferencë për mediat, të zhvilluar këtë të hënë është shprehur se kushdo që tenton të prekë votën në zgjedhjet e 14 majit do të mbajë përgjegjësi.
I pyetur nga gazetarët nëse e shqetëson fakti që koalicioni “Bashkë Fitojmë” do të ketë një komisioner në KZAZ dhe numërues vetëm në gjysmën e vendit, Meta tha se do të jetë populli ai që do të votojë, do të numërojë, dhe do të monitorojë procesin zgjedhor.
“Ky është një proces që e ka marrë populli, që do të votojë pavarësisht përpjekjeve që bëhen për të dekurajuar pjesëmarrjen në këtë zgjedhje. Populli do të votojë, do të numërojë, do të monitorojë. Të gjithë do të jemi para qendrave të votimit deri në momentin që do të numërohet edhe vota e fundit. Këto janë procese që i takojnë të kaluarës ku Rama trukonte ndeshjen. Do të jenë shumë të pashpresë ata që mendojnë se kjo pakicë uzurpatore mund të prekë edhe një votë të qytetarëve shqiptarë. Përgjegjësinë e kanë ata dhe po të jenë të zotë le ta mbajnë”-tha Meta.
