Policia e Kosovës bën me dije se ka pezulluar nga detyra 4 efektivë policie, pasi dyshohet se kanë qenë të përfshirë në incidentin e një dite më parë në veri të vendit, ku mbeti i plagosur një banor i komunitetit serb.
Më herët, policia e Kosovës mohoi të kishte qenë e përfshirë në këtë ngjarje, por dëshmia e një burri konfirmoi se në momentin e plagosjes së serbit në vendngjarje, në urën e Bistricës kanë qenë të pranishëm vetëm pjesëtarët e forcave speciale të Policisë së Kosovës.
“Bazuar në informacionet dhe dëshmitë e siguruara, janë marrë masa të suspendimit ndaj zyrtarit policor, pasi i njëjti nuk kishte raportuar lidhur me rastin dhe për përfshirjen e tij në rast, nga ku PK-ja kishte lëshuar njoftim se nuk ka qenë e përfshirë në shkëmbim apo gjuajtje me armë zjarri. Po ashtu janë marrë masa të suspendimit edhe ndaj tre zyrtarëve të tjerë të mundshëm të përfshirë në rast”, thuhet në komunikatën e Policisë.
Drejtori i Zyrës për Kosovën në Qeverinë e Serbisë, Petar Petkoviq e dënoi më herët gjatë ditës këtë incident, duke e cilësuar si një sulm të kryer nga Policia e Kosovës.
