Kryeministri Edi Rama ka reaguar lidhur me hartën e vendosur nga presidentit i Melia Group në Konventën Ndërkombëtare të Turizimit të organizuar në vendin tonë ku Kosova nuk shfaqej si shtet i pavarur.
Pas reagimeve publike, kreu i qeverisë sqaron nëpërmjet një postimi në rrjetet sociale se nuk ua kontrollojnë hartën të ftuarve.
Rama ndër të tjera thotë se “dihet se ashtu e ka Spanja hartën e rajonit” dhe se “nuk i ka ardhur asgjë e keqe kombit nga dalja 1 minutë e asaj harte”.
“Kinse patriotët kanë gjetur punë sot duke u marrë me një hartë të prezantimit të presidentit të gjigandit spanjoll Melia Group në konventën e turizmit, ku mungonte Kosova! Dihet që Spanja ashtu e ka hartën e rajonit po asgjë e keqe s’i erdhi kombit nga dalja 1 minutë e asaj harte! Shqipëria s’është Irani ku të ftuarve në konferenca ndërkombëtare u kontrollohen prezantimet dhe as konventa s’ishte sheshbeteja diplomatike për njohjen e Kosovës nga Spanja! E keqja kombit tonë i vjen bash nga ata që merren tërë ditën me kësi luftrash pa lidhje mes shqiptarësh”, shkruan Kryeministri Rama.
