Një arritje e tillë do të zbehte edhe vetë Zhyl Vern (autori i Rreth Botës në 80 ditë). Dave Smith, Paul Thompson, Tony Palin dhe Jamie Bacon, katër ish-ushtarakë, po përshkojnë gjerë e gjatë Anglinë me objektivin për të vizituar 92 stadiume në 92 orë. Pas një plani të studiuar për 12 muaj për të përcaktuar detajet dhe për t’u njohur me rrugët, katër miqtë kanë kuptuar se mund t’ia dilnin dhe kështu, të shtyrë nga dëshira për të grumbulluar fonde në favor të SSAFA (Shoqatë ushtarake bamirësie), i kanë shpallur luftë kronometrit.
ETAPAT – Turi i forcës ka nisur të enjten në Goodison Park dhe vija e finishit duhet të kalohet nesër në “Anfield”. Itinerari parashikon një udhëtim prej më shumë se dymijë miljesh dhe për ta realizuar katër shokët kanë vendosur të përdorin një makinë, pasi një kamper ose një furgon nuk do t’i kishte lejuar të respektonin kohët e parashikuara në tabelën e marshimit. Me synimin për ta realizuar me sukses këtë sfidë, ish-ushtarakët kanë ndarë rolet, detyrat dhe orët e punës, siç bënin në kohët kur ishin me mision. Dy prej tyre bëjnë pushim, njëri i jep makinës dhe tjetri bën asistentin dhe shoferin e dytë. Më pas vjen zëvendësimi. Turnet janë nga 8 orë. Për të certifikuar kalimin në çdo impiant të deklaruar para nisjes, grupi po bën fotografi që i poston në rrjetet sociale. Ndalesa para stadiumeve është fiks një orë, më pas nisen me shpejtësi drejt etapës së radhës.
“DO T’IA DALIM” – Dave Smith, kur vishte uniformën, ishte përgjegjës për komunikimin. Kështu i takon atij tani të flasë me shtypin: “Jemi shumë të vendosur dhe të bindur se mund të arrijmë deri në fund. Për më tepër, po e bëjmë këtë për një çështje bamirësie. Jam një tifoz i madh i futbollit, kështu që mund të them se të vizitoj 92 stadiume dhe të marr në shtëpi fotografitë është një ëndërr që realizohet”. Por i pret një punë shumë e madhe dhe momentet e vështira nuk mungojnë. Katër miqtë kanë bërë shaka duke thënë: “Nuk e dimë nëse të shtunën në mbrëmje do të jemi akoma miq!”.
