Biletat për ndeshjen mes Shqipërisë dhe Spanjës, e vlefshme për Grupin G kualifikues të Botërorit “Rusi 2018” kanë nisur nga dita e sotme të shiten në internet. Lajmi është bërë i ditur përmes një komunikate të Federatës Shqiptare të Futbollit, e cila njofton të gjithë tifozët, sportdashësit dhe gjithë të interesuarit se ka filluar shitja online e biletave në uebin zyrtar të Federatës ‘fshf.org’ për ndeshjen Shqipëri- Spanjë, që do të zhvillohet në datën 9 tetor në stadiumin ‘Loro Boriçi’ të Shkodrës. Në shitje janë bileta nga të gjithë sektorët e stadiumit, përfshirë edhe ato VIP, ndërkohë që federata bën me dije se ofron dhe paketa abonimesh për të gjitha ndeshjet e Kombëtares, të cilat mund të përfitohen me një çmim të reduktuar prej 15 për qind.
