Me qëllim për të lehtësuar burokracitë dhe për t’iu përgjigjur sa më mirë kërkesës në industrinë e turizmit, 700 udhërrëfyes tashmë janë pajisur me certifikata pa afat.
Kjo u bë e ditur nga ministrja e Turizmit, Mirela Kumbaro, pasi u takua me një përfaqësi të udhërrëfyesve turistikë.
“Kemi sot në total 932 udhërrëfyes të certifikuar, nga të cilët, 112 udhërrëfyes të specialitetit të veçantë, 691 udhërrëfyes turistikë kombëtarë dhe 120 udhërrëfyes lokalë. E gjitha kjo trupë që është shtuar gati tetë herë në katër vitet e fundit tregon se ka një treg shumë interesant që ka gjeneruar punësim dhe aktivitete për zinxhirin e ekonomisë”, tha ministrja e Turizmit, Mirela Kumbaro.
Një certifikim i tillë, sipas Ministrisë së Turizmit, krijon një mjedis më atraktiv për të rinjtë që duan të ndërtojnë një karrierë në turizëm dhe promovojnë vlerat e natyrës, eko-turizmin dhe turizmin e zonave të mbrojtura.
Aktualisht në vend janë 15 qendra të akredituara që ofrojnë programe trajnimi për formimin e udhërrëfyesve turistikë.
Klan News
