Kreu i Prokurorisë së Posaçme, Altin Dumani ka reaguar ditën e sotme lidhur me pyetjet e bëra një ditë më parë nga kryetari i Bashkisë së Tiranës, Erion Veliaj.
Ky i fundit i shtroi shtatë pyetje SPAK-ut nëpërmjet një mesazhi të gjatë në rrjete sociale, ku pretendonte se kishte mbetur pa përgjigje.
Gjatë një komunikimi me gazetarët ditën e sotme, Dumani tha se nuk i ka lexuar pyetjet e Veliajt dhe thekson se institucioni reagon kur e shikon të arsyeshme.
“Nuk i kam lexuar pyetjet e të pandehurit, patjetër ka dhe raste kur institucioni e shikon të arsyeshme se duhet të reagojë, ka pasur reagime.
Në rastin konkret nuk kemi asgjë për të reaguar. Ne i garantojmë të drejtat të pandehurit në proces dhe i përgjigjemi me dokumente dhe me prova.
Ne nuk komunikojmë me të pandehurin në një formë tjetër”, tha Dumani për gazetarët.
