Ditën e sotme Prokuroria e Krimeve të Rënda kërkoi 21 vite burg për biznesmenin Arbër Çekajn, administratori i “Arbi Garde”’, i akuzuari për trafikimin e 613 kilogramëve kokaine që u gjet të fshehur në një kontejner me banane.
Për shkak të gjykimit të shkurtuar, Çekaj përfiton ulje dënimi duke i shkuar në 14 vite burg. Gjithashtu, Prokuroria ka kërkuar 10 vite e tetë muaj për Donaldo Lushajn si dhe 8 vite e 8 muaj për Armando Pezakun.
Por, gjatë kohës që njihej me kërkesën e Prokurorisë, ka folur vet Çekaj, i cili është shprehur se; “Jam këtu për të fshehur një grup kriminal shumë të famshëm”.
Çekaj tha gjithashtu se prokuroria arrestoi tre persona për të krijuar vetë një grup kriminal, duke u thënë partnerëve që prokuroria po bën punë të pavarur.
“Kjo bëhet për të gënjyer autoritet italiane se operacioni përfundoi, që të gënjenin ambasadorët e huaj se prokuroria po punon e pavarur”- ka thënë ai.
Por, në mbyllje të seancës, Prokuroria është shprehur se Çekaj dhe të pandehurit e tjerë janë pjesë e grupit kriminal që trafikoi 613 kg kokainë.
Arbër Çekaj: Unë dhe këta të tre jemi këtu se prokuroria duhet t’u thoshte italianëve se operacioni përfundoi me sukses. Që të gënjenin të huajt që prokuroria po punon e pavarur nga politika. Na arrestuan për të fshirë një grup të strukturuar shumë të famshëm. Nuk e dija që qenkam kaq i famshëm që kolumbianët te më bënin dhuratë kaq drogë, pse nuk e vazhduat aksionin që unë të fusja duart tek droga? Pse e ndërpretë aksionin?
Të isha kaq i zgjuar nuk do shisja banane, po do kisha makina e vila. Unë nuk e kuptoj pse doni ta çoni këtë çmenduri deri në fund për të mbrojtur persona të tjerë. Mendoni ju se Guarda di Finanza nuk e kishte konstatuar ngarkesën? Ata e konstatuan dhe e lanë qe të shkohej te autorët dhe të zbulohej rrjeti i vërtetë.
Po si mendoni që unë i lashë një 20 vjeçari gjithë këtë investim pa u siguruar, si mund ta lija unë gjithë këtë drogë në dorë të dy të rinjve, Donaldo Lushaj jeton me qira , mirë unë që qenkam budalla dhe skam vila e luks po edhe ky? Unë nuk jam kriminel, kur më arrestuan në gjermani bëja shaka me policët, kjo prokurori ka bërë komplot ndaj meje. Kam qenë jam dhe do jem i pafajshëm, më gjykoni në bazë të provave e fakteve./ Opinion.al
