Forcat britanike të Antiterrorit arrestuan këtë të hënë gjashtë persona, të akuzuar se do të kryenin sulme terroriste në vendin ishullor. Në pranga ranë 5 burra, nga 22 në 35 – vjeç dhe 1 grua 32 – vjeçare.
Operacioni blic u zhvillua në disa qytete, përfshirë edhe Londrën. Policia ushtroi kontrolle në 6 prona në këto qytete, në kërkim të materialeve që lidhen me të ndaluarit.
Siç raporton BBC, arrestimet e kryera janë cilësuar si të rëndësishme nga policia. Hetuesit britanikë thanë për mediat se grupi i neutralizuar po planifikonte një atentat terrorist, por nuk ka të dhëna se do të godisnin së shpejti.
Sipas autoriteteve britanike dyshohet se të arrestuarit kishin edhe lëndë shpërthyese, për këtë arsye në Normanton, një prej qyteteve ku u ushtruan kontrolle, njësia Antibombë ushtroi një sërë kontrollesh.
Që prej vitit 2014, Britania e Madhe ndodhet në gjendje maksimale alarmi. Muajin e kaluar, Shefi i Inteligjencës britanike, MI5, tha se janë shmangur mbi 12 sulme terroriste në 3 vitet e fundit.
Tv Klan
