Prokuroria e Tiranës, në bashkëpunim me policinë e kryeqytetit, ka finalizuar me sukses operacionin “Mashtrimi” duke ekzekutuar disa masa sigurie të vendosura nga gjykata.
Më konkretisht bëhet fjalë për arrestimin e një personi dhe detyrimin për t’u paraqitur të tre të tjerëve.
“Prokuroria pranë Gjykatës së Shkallës së Parë të Juridiksionit të Përgjithshëm Tiranë në bashkëpunim të ngushtë me Drejtorinë e Hetimit Tatimor dhe Drejtorinë Vendore të Policisë Tiranë pas një pune disa mujore me metoda speciale të hetimit, finalizoi me sukses operacionin e koduar ‘Mashtrimi’, duke bërë të mundur ekzekutimin e vendimit të Gjykatës së Rrethit Gjyqësor Tiranë, dhoma penale, e cila caktoi masa sigurimi ndaj 4 shtetasve: Shtetasi S.M. ‘arrest në burg’; dhe Shtetasit Z.R. E.S. dhe P.K. ‘Detyrim për tu paraqitur në policinë gjyqësore’”, njoftoi prokuroria.
Sipas organit të akuzës rezulton se janë krijuar 3 subjekte tregtare për të kryer importet në favor të tregtarëve të ndryshëm, që këta të fundit ta marrin produktin pa faturë. Në këtë mënyrë ata i kanë shkaktuar shtetit një dëm prej 53 milionë lekësh.
“Këto shoqëri objekt hetimi, kanë funksionuar si ‘nipte shëtitës’ dhe personat (tregtarë) që fshihen pas këtij aktiviteti përfitojnë të ardhura duke mos deklaruar xhiron reale, shmangur detyrimet tatimore dhe duke i shkaktuar shtetit një dëm prej 53.000.000 lekësh. Nga hetimet, rezultoi se këto subjekte kanë kryer importe të mallrave të ndryshme, të cilat janë përdorur për rishitje nga subjekti kundrejt pagesës (ose pa dijeninë e tyre)”, njoftoi policia.
Rezulton se personi i arrestuar, shtetasi S.M., ka përdorur të dhënat e tre personave të tjerë, me të cilat ka regjistruar këto subjekte dhe ka kryer çdo veprim në emër të tyre.
“Këta shtetas kanë konsumuar elementet e veprës penale ‘Krijimi i skemës së mashtrimit në lidhje me tatimin mbi vlerën e shtuar’, ‘Fshehje të ardhurash’ dhe ‘Moskallëzim të krimit’ të parashikuara nga nenet 144/a, 180, 300 të Kodit Penal”, njoftoi prokuroria.
Gjithashtu, dyshohet se në këtë skemë kriminale mashtrimi janë të përfshirë persona, subjekte të tjera, studio kontabiliteti, si dhe funksionarë të administratës shtetërore, për të cilët vazhdojnë hetimet për të dokumentuar të gjithë veprimtarinë kriminale.
