Ministria e Shëndetësisë ka njoftuar se janë konfirmuar edhe 4 raste të reja me koronavirus në Shqipëri gjatë 24 orëve të fundit.
Në një deklaratë për mediat u bë me dije se në 24 orët e fundit janë testuar 60 persona të dyshuar, prej të cilëve janë konfirmuar 4 raste të reja me COVID-19.
“Tre janë raste kontakti në gjendje të mirë shëndetësore dhe një rast i ri, një pacient 66-vjeçar që po trajtohet në terapi intensive në spitalin infektiv në QSUT. Deri në këto momente janë testuar 665 raste të dyshuara dhe prej tyre janë të konfirmuar pozitivë me COVID-19, 59 raste”, u tha në deklaratën e ministrisë.
Nga rastet e konfirmuara në Tiranë janë 42 raste , Durrës 5 raste, Lushnje 2 raste, Elbasan 2 raste, Fier 6 raste dhe Rrogozhinë 2 raste.
Nga këta, 30 janë të shtruar në spitalin Infektiv (nga Tirana, Durrësi, Fieri, Elbasani dhe Rrogozhina). Prej tyre, tre pacientë janë në terapi intensive. Ndërsa pjesa tjetër e të shtruarve në pavion janë në gjendje të stabilizuar deri në këto momente.
Gjatë deklaratës së ministrisë u dhanë edhe detaje lidhur me 66-vjecarin nga Lushnja që ndërroi jetë sot nga komplikacionet e shkaktuara prej COVID-19.
“Mëngjesin e sotëm ka ndërruar jetë një pacient i moshës 66-vjecare në spitalin Infektiv, që vuante nga disa sëmundje shoqëruese: insuficenca kardiake, edemë pulmonarë dhe insuficencë renale. Prej disa ditësh pacienti ishte i intubuar (me respiracion të drejtuar) në gjendje të rëndë shëndetësore”. /Opinion.al
