Më 3 Prill pritet të nisë gjykimi ndaj ish-krerëve të UÇK-së Hashim Thaçit, Kadri Veselit, Rexhep Selimit e Jakup Krasniqit.
Këtë e ka bërë të ditur avokati i Selimit, Geotrey Roberts, i cili para Dhomave të Specializuara në Hagë ka thënë se në bisedat me Zyrën e Prokurorit të Specializuar janë marrë vesh që data e fillimit të gjykimit në çështjen penale Thaçi dhe të tjerët të jetë 3 Prilli gjë të cilën e ka konfirmuar edhe prokuroria.
Në këtë datë, sipas Roberts, planifikohen deklaratat hyrëse e më pas të vazhdohet me dëgjimin e dëshmitarëve të parë.
Mbi 312 dëshmitarë do të paraqesin dëshmitë e tyre në këtë proces gjyqësor. Sipas Prokurorisë, në procesin e gjykimit do të përmenden mbi 40 vende ku pretendohet të jenë kryer krimet.
Ka thënë se i duhen rreth 600 orë për paraqitjen e të gjitha provave, deri nga fundi i vitit 2024 apo fillimi vitit 2025, ashtu që të ketë proces të drejtë gjyqësor.
Avokati i ish-kryetarit të Kuvendit të Kosovës, Kadri Veseli, Ben Emmerson ka deklaruar se trupi gjykues mund të përdorë diskrecionin që ka, pasi siç ka thënë ai kohëzgjatja e procedurës është armik i drejtësisë dhe armik i të drejtave të të akuzuarve.
Në Nëntor të vitit 2020, në paraqitjet e tyre të para, Hashim Thaçi Kadri Veseli, Jakup Krasniqi dhe Rexhep Selimi janë deklaruar të pafajshëm për akuzat e pretenduara.
