Emisioni “Stop” ndodhet në Luz të vogël të Kavajës, ku takoi zotin Vahid Lusha. Ai së bashku me 3 vëllezërit, fituan të drejtën e pronës në vitin ‘94 nga Komisioni i Kthimit dhe Kompensimit të Pronave për 16 mijë m2 tokë.
Në vitin 2009 u skualifikua nga ATP, por më pas e rifitoi të drejtën në dy shkallët e gjyqësorit. Sot, kanë kaluar 30 vjet, por Vahidi thotë se nuk kanë marrë as tokë dhe pas para.
“Ne i morëm me letra, por konkretisht asnjë gjë nuk kemi marrë deri më tani. Në vitin 2009 ATP na skualifikoi me arsyen që ne nuk kemi dokumente të mjaftueshme. Këtë vendim ne e hodhëm në gjykatë. Gjykata na dha të drejtë, ç’fuqizoi vendimin e kompozimit të pronave të qarkut të Tiranës. Gjatë këtyre 14 viteve kam bërë kërkesë në vazhdimësi për vlerësimin e këtij vendimi, por deri tani asnjë gjë. Heshtje prej varri! Më thonë që të gjitha vendimet nga viti 1993 deri në vitin 2013 janë vlerësuar, kurse vendimi juaj i viti 1996 nuk figuron në fletoren zyrtare si i tillë”, tha denoncuesi.
Kur shkon në ATP i thonë, që duhet të presë pa afat, që vendimi të dalë në Fletoren Zyrtare.
Qytetari: Kam një dosje këtu 236-tën, po s’kam marrë asnjë lloj përgjigje.
Informacioni: Keni bërë kërkesë?
Qytetari: Kam bërë disa herë kërkesa, gjatë pothuajse 14-15 herë.
Informacioni: Tani së fundmi keni bërë ndonjë kërkesë?
Qytetari: Po!
Informacioni: Kthim-përgjigje, ju ka ardhë?
Qytetari: Po s’më kanë dhënë asnjë lloj përgjigje.
Informacioni: Po! Nuk është publikuar ende. Duhet të publikohet te fletorja zyrtare. I bie, që duhet të dalë te fletorja zyrtare njëherë, që të vazhdojmë procedurat. Pra, mund të bëni një kërkesë…!
Qytetari: Jo moj, e kam bërë unë kërkesën.
Informacioni: Thjesht do prisni!
Qytetarja: Dhe sa kohë duhet të presim?
Informacioni: Nuk kemi një afat të caktuar. Të dyja përgjigjet thonë të njëjtën gjë. Thotë, ju sqarojmë, që aktualisht ATP-ja është në pamundësi objektive të ekzekutojë kërkesën për vlerësimin financiar të vendimit, për shkak të pezullimit. Atëherë ka qenë pezull. Sot, që nuk është pezull, nga verifikimet e regjistruara, vendimi juaj i 96-ës, në emër të subjektit të shpronësuar, filan nuk figuron e publikuar në vlerësimin financiar.
Qytetari: Pse?
Informacioni: Sepse duhet të prisni, që të publikohet! Duhet të publikohet! Këto publikohen në një fletore zyrtare.
Qytetarja: Është çuar emri i zotërisë, që të publikohet te fletorja zyrtare?
Informacioni: Tani nga momenti, që thotë ende nuk është publikuar, i bie që është çuar, edhe kur të publikohet, do publikohet edhe emri juaj.
“Stop” mori kontakt me Agjencinë e Trajtimit të Pronave, ku thanë, që nuk kanë të administruar vendimin e formës së prerë, vendim që e çon vetë qytetari në ATP.
Ai shpreson të mund të gjejë të drejtën, sa është gjallë pasi vëllezërit kanë ndërruar jetë pa e gëzuar pronën e tyre./tvklan.al
