Policia e Tiranës ka reaguar pas publikimit të një videoje në rrjetet sociale, ku pretendohet se punonjësit e Policisë kanë ushtruar dhunë ndaj një 30-vjeçareje të ndaluar në Komisariatin nr.1 në kryeqytet.
Në një njoftim zyrtar, Policia sqaron se gjatë gjithë ndërhyrjes dhe procedurave ndaj shtetases A. P., banuese në Prishtinë, nuk është ushtruar asnjë formë dhune. Sipas Policisë, të gjitha veprimet janë kryer në përputhje me procedurat standarde, në prani të një punonjëseje të Policisë.
“Sqarojmë se në asnjë moment shërbimet e Policisë nuk kanë ushtruar dhunë ndaj 30-vjeçares dhe pretendimet e bëra publike nuk janë të vërteta. Punonjësit e Policisë kanë zbatuar në mënyrë të rregullt detyrën dhe kanë vepruar në bazë të ligjit”, thuhet në njoftimin zyrtar.
Ngjarja ka ndodhur rreth orës 03:50 të datës 21 qershor, kur u ndalua një automjet i drejtuar nga një 23-vjeçar, vëllai i të arrestuarës, i cili dyshohej se ishte në gjendje të dehur. Më pas, në vendngjarje mbërriti edhe e reja, e cila kundërshtoi me dhunë punonjësit e Policisë. Pasi kjo e fundit u ndalua, rezultoi po ashtu në gjendje të dehur.
Në ambientet e komisariatit, 30-vjeçarja ka goditur me grusht xhamin e dhomës së shoqërimit.
Njoftimi i policisë
Drejtoria Vendore e Policisë Tiranë
Specialistët për Hetimin e Krimit në Komisariatin e Policisë Nr. 1, arrestuan në flagrancë shtetasen A. P., 30 vjeçe, banuese në Prishtinë, Kosovë.
Arrestimi i saj u bë pasi: Rreth orës 03:50 të datës 21.06.2025, gjatë patrullimeve me objektiv garantimin e rendit dhe parandalimin e paligjshmërive, shërbimet e Forcës së Posaçme “Shqiponja” kanë ndaluar për kontroll dhe verifikim automjetin me drejtues shtetasin E. P., 23 vjeç. Gjatë komunikimit me punonjësit e Policisë, 23-vjeçari ka krijuar dyshime se ky shtetas drejtonte automjetin nën efektin e alkoolit. Për këtë arsye është kërkuar ndihma e punonjësve të Policisë Rrugore për t’i bërë testin e alkoolit, ku testi i parë ka rezultuar 0.48 mg/l. 23-vjeçarit i është kërkuar të bëjë për herë të dytë testin e alkoolit, në zbatim të procedurës standarde, por ai ka refuzuar të kryejë testin e dytë.
Në momentin që punonjësit e Policisë po komunikonin me 23-vjeçarin për të bërë testin e alkoolit, aty ka ardhur me një automjet tjetër shtetasja A. P., motra e tij, e cila ka kundërshtuar me dhunë punonjësit e Policisë, duke i penguar ata të kryenin detyrën. Punonjësit e Policisë i kanë bërë testin e alkoolit edhe 30-vjeçares, në prani të një punonjëseje policie(e cila ka qënë prezent nga momenti i parë e deri në përfundim të të githa veprimeve), ku rezultoi se 30-vjeçarja drejtonte automjetin nën efektin e alkoolit në masën 0.38 mg/l.
30-vjeçarja është shoqëruar në ambientet e Komisariatit të Policisë Nr. 1, për veprime të mëtejshme për kundërshtim të punonjësve të Policisë. Gjatë kohës që ndodhej në ambientet e dhomës së shoqërimit, shtetasja A. P. ka goditur me grushte xhamin e dritares së kësaj dhome, duke e thyer atë.
Në përfundim të veprimeve u bë arrestimi në flagrancë për veprat penale “Kundërshtimi me dhunë i punonjësit të policisë së rendit publik”, “Shkatërrimi i pronës” dhe “Drejtimi i automjetit në mënyrë të parregullt”. Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme.
Sqarim: Në lidhje me një video të publikuar në rrjetet sociale për këtë rast theksojmë se: Shërbimet e Policisë, në asnjë moment, nuk kanë ushtruar dhunë ndaj 30-vjeçares dhe pretendimet e bëra publike nuk janë të vërteta. Punonjësit e Policisë kanë zbatuar procedurat standarde të punës dhe në asnjë moment nuk kanë ushtruar dhunë ndaj saj apo ndaj vëllait të saj, të përfshirë në këtë rast.
