Është vënë në në pranga menjëherë pas një nate të gjatë marrjeje në pyetje 30 -vjeçari Laert Kumaraku, shqiptari që akuzohet se të premten në mesditë ka goditur për vdekje me thikë në zemër kunatin, burrin e të motrës, Dritan Mali në shtëpinë e tyre në Carpeneda di Vobarno.
“Vrasje me dashje” është akuza që rëndon mbi të riun, i cili gjatë dëshmisë së tij nuk ka pranuar të marrë përsipër përgjegjësinë e vrasjes, duke nënvizuar se vetëm sa ka ndërhyrë në sherrin mes viktimës dhe motrës së tij. e cila po rrihej nga burri.
Karabinierët e Salò e di Vobarno dhe prokurorja Erica Battaglia ka pyetur për orë të tëra të riun dhe motrën e tij, Jerina Kumaraku, gruaja e viktimës, që ishte në shtëpi në momentin e krimit. Por, rindërtimi i historisë duket se nuk mund të bëhet lehtë sepse deklaratat e dhëna janë të ndryshme dhe nuk përputhen.
DEKLARATAT
Deklaratat e dhëna nga Laert dhe Jerina Kumaraku, sipas hetuesve, janë pak të besueshme. Mbi të gjitha sa i përket një momenti tepër të rëndësishëm dhe akoma në hije…goditja me thikë. Sipas dëshmisë së dy vëllezërve, 37 vjeçari Dritan Mali kishte rënë në tokë pas grindjes dhe vetëm në këtë moment Laert dhe Jerina kishin vënë re një thikë mbërthyer në zemrën e tij dhe gjakun që i rridhte në trup. Por thika e kuzhinës nuk mund të kishte përfunduar vetë në zemrën e viktimës. Pra, kush e mori atë nga kuzhina? Hetuesit po punojnë për të gjetur momentet pikante që të premten, kanë nxitur mosmarrëveshjen familjare e cila më pas përfundoi në tragjedi.
SI NISI SHERRI
Gjithçka filloi rreth mesditës, kur Jerina, e njohur nga fqinjët si “Rina”, kthehet në shtëpi për të nisur debatin me burrin e saj Dritan. Është mesditë, por nuk ka asgjë në tryezë. Për fat të mirë në banesë nuk është djali i çiftit, i cili është gjashtë vjeç dhe është në shkollë, si çdo mëngjes. Dritan dhe Rina fillojnë debatin midis kuzhinës dhe dhomë së ndenjies. Laerti, në fillim, mendon të mos ndërhyjë dhe i lë të flasin burrë e grua. Ai del në ballkonin e shtëpisë, ku pi një cigare dhe pret që sherri të marrë fund. Më pas shkon brenda dhe sheh se tonet janë ngritur. Në atë moment Laert vendos të bëjë diçka. Por, sipas versionit të tij të ngjarjeve, përpjekja e tij për të qetësuar gjakrat dështon, dhe Dritani ngre dorë mbi gruan e tij. Pastaj vëllai vendos të ndërhyjë në mbrojtje të Jerinës.
Kunetërit nisën të rrihën, ndërkohë Dritan bie në dysheme me një thikë të madhe kuzhine mbërthyer në zemër. Kur Laert dhe motra panë gjakun, kuptuan se Dritani ishte plagosur dhe telefonuan ambulancën. Dhe në këtë pikë historia zbehet, ata përhumbin, nuk japin përgjigjet e duhura: Ajo ishte dinamika e mosmarrëveshjes? Cili e kishte thikën në dorë? Nuk ishte një vetëmbrojtje?
DHUNA
Laert dhe Jerina Kumaraku nuk i kanë bindur hetuesit me deklaratat e tyre, të cilët tani presin elemente të rëndësishme nga Laboratori i Krimit dhe nga ekspertiza e trupit të viktimës për të zbardhur ngjarjen. Ishin ata të cilët kërkuan ndihmë. Vëllai kishte mbetur në shtëpi me viktimën, ndërsa gruaja, në rrugë, duke pritur për ardhjen e ambulancës. Laert nuk u largua dhe e pa kunatin teksa jepte shpirt para syve të tij. Jerina, gruaja e viktimës në trup ka shenja dhune por pritet të sqarohet nëse rrahjet lidhen vetëm me të premten apo nëse ‘Rina’ në të kaluarën ka qenë viktimë e dhunës nga bashkëshorti i saj. Në këtë pikë janë përqëndruar hetimet. Nuk përjashtohet që në orët e ardhshme Jerina Kumaraku mund të merret sërish në pyetje për të përcaktuar më mirë rolet në tragjedinë familjare.
Përkthyer nga Bresciaoggi.it – PANORAMA
