Një ngjarje e rëndë ka ndodhur në një çerdhe shtetërore në Fushë-Kosovë ku një fëmijë vetëm 3-vjeç është dhunuar nga edukatoret e këtij institucioni.
Daja i fëmijës, Fatos Geci, thotë se njëra nga edukatoret e dhunon dhe më pas e tërheq zvarrë vogëlushin nëpër çerdhe.
Sipas tij, 3-vjeçari është futur brenda një dhome pa kamera ku është dhunuar brutalisht nga pastruesja dhe kuzhinierja e institucionit.
Pasi e nxjerrin nga dhoma, sërish një tjetër edukatore shkon dhe e tërheq zvarrë.
“Dua të ndaj me ju diçka të tmerrshme që sapo ka ndodhur në Fush Kosovë, në çerdhen shtetërore të fëmijëve “Gezimi yne”, është rrahur brutalisht nipi im i preferuar Lisi, vetëm 3 vjeç. Shikoni kamerat ku shihet qarte qe po rrihet ne derë pastaj terhiqet zvarre, me pas e dergojne perseri ne nje dhome pa kamera dhe e rrahin pa meshire te 2 “mesueset” e kesaj qerdhje bashkë me pastruesen apo kuzhinjeren! 🥲
Nipi im ka pësuar trauma të rënda psiqike dhe nuk mund të flejë më, nipi po përjeton një ankth të madh. Kërkoj nga organet e drejtësis të bëjnë punën e tyre. IDIOTEVE dhe mostrave të tilla duhet t’i jepet fund një herë e përgjithmonë. Le të jetë rasti i fundit i dhunës ndaj fëmijëve. DHUNUESET e tilla NUK e kane vendin ne arsim.👎”, shkruan ai.
Gjithashtu daja i vogëlushit ka treguar edhe shenjat e dhunës në trupin e të miturit.
Ndërkaq për rastin ka reaguar edhe ministrja e Arsimit, Shkencës dhe Teknologjisë së Kosovës, Arbërie Nagavci, e cila ka deklaruar se do të merren të gjitha masat e nevojshme ndaj abuzuesve, ndërsa theksoi se “nuk është vetëm reagim i një edukatore por shihet se është më shumë se një person, që kanë qëndruar indiferente ndaj rastit”.
“Inspektorët e arsimit janë atje, pres dhe do të sigurohem që si ministre të merren të gjitha masat që janë të parapara ndaj abuzuesve të fëmijëve tanë. Jam tejet e shqetësuar që nga ato pamje duket se nuk është rast i izoluar, nuk është vetëm reagim i një edukatore por shihet se është më shumë se një person, që kanë qëndruar indiferente ndaj rastit”, ka bërë të ditur ajo, raportojnë mediat kosovare.
