Mozaiku i turistëve të huaj në Shqipëri është zgjeruar bashkë me flukset që po shtohen në çdo stinë.
Të dhënat zyrtare tregojnë se nga janari deri në maj në vendin tonë kanë hyrë rreth 3.4 milionë të huaj, një rritje kjo me gati 4% në krahasim me po të njëjtën periudhë të vitit të kaluar.
Dominojnë europianët, por për këtë 5-mujor rritja më e fortë në shifra në krahasim me vitin e kaluar vjen nga Izraeli.
“Ndërsa tensionet dhe pasiguria mbizotërojnë në Lindjen e Mesme, një valë e re turistësh nga Izraeli ka zgjedhur Shqipërinë si destinacion pushimesh. Të dhënat e Ministrisë së Turizmit tregojnë se në 5 muaj kanë ardhur në Shqipëri rreth 12 mijë e 300 shtetas nga Izraeli, gati 5 herë më shumë sesa në vitin 2024”, raporton gazetarja e Tv Klan, Dorina Halili.
“Izraeli ka një rritje goxha të lartë. Rritjen ne e shikojmë për shkak të rritjes së brand-it të Shqipërisë ndaj Izraelit dhe qasjes që ka Shqipëria ndaj Izraelit. Ata janë shumë të ndjeshëm ndaj qasjeve pozitive ndaj tyre, duke qenë se është një popull i stigmatizuar”, thotë Aneo Hila, operator turistik.
Megjithatë, situata aktuale ka sjellë anulime masive të turistëve nga Izraeli për sezonin veror.
Nga shtetet europiane, rritjen më të lartë këtë vit e kanë shënuar hyrjet nga Franca, Finlanda dhe Bosnje-Hercegovina.
“Jam i lumtur që jam këtu. Është hera ime e parë në Shqipëri dhe jam surprizuar nga bukuria e këtij vendi. Jam nga Tunizia, ishim edhe në Sarandë, plazhi ishte fantastik”, thotë një turist.
“Në respekt të vendeve të tjera në Europë, dua të them se këtu e ndjen kulturën e shqiptarëve kudo që të shkosh, kështu që kam përshtypje shumë të mira”, shton një tjetër.
“Ne kemi vizituar shtete si Spanja, Italia dhe Portugalia, por vendi më i sigurt si turist mendoj se është Shqipëria”, shprehet një tjetër.
“Ajo që shikoj unë si pozitive këtë vit është ngritja me shifra goxha të larta të turistëve që vijnë nga tregjet kryesore që ne kërkojmë. Kemi rritje goxha të mira nga Anglia, SHBA, Zvicra, Franca, Gjermania, Austria, Finlanda , janë tregje shumë të mira që ne kemi kohë që i kërkojmë…”, thotë Aneo Hila.
Hyrjet nga Kosova këtë vit kanë pësuar një ulje me rreth 7%, megjithatë janë lokomotiva e fluksit të vizitorëve, ndërsa turistët nga Italia mbeten në vend të dytë.
Tv Klan
