Deputetët e Kuvendit të Shqipërisë që kanë pasion armët, apo që i mbajnë ato për arsye ende të pa deklaruara, me sa duket nuk i kanë munguar legjislaturave.
Java News me anë të një përmbledhje të ngjarjeve kryesore, ka hedhur vështrimin në kohë, duke sjellur histori, deri diku të harruara, të ligjvënësve që në vite të ndryshme i kanë keqpërdorur armët e dhëna me leje apo që edhe kanë mbajtur të tilla në kundërshtim me ligjin.
Dhjetor 1990 – Spekulimet për Hajdarin
Takimi i ish-presidentit Ramiz Alia me studentët protestues në dhjetor të vitit 1990 u shoqëruar edhe me komente. Si për punonjësit e sigurisë, ashtu edhe për vetë dëshmitarët e kohës ai që binte në sy ishte studenti Azem Hajdari. Ky i fundit u dallua kryesisht për trimërinë që shfaqte gjatë aktiviteteve të shumta të asaj periudhe. Në atë kohë, por edhe nga dëshmitë e protagonistëve apo kundërshtarëve të Hajdarit u tha se ai në atë kohë mbante pistoletë në brez. Kjo dëshmi nuk u provua kurrë, por dihet që gjatë legjislaturës që Hajdari ishte deputet, ai gjithmonë gjendej i armatosur.
Shtator 1997 – Gafur Mazreku plumba në Kuvend
Një vit përpara se Hajdari të vritej, deputeti socialist Gafur Mazreku e plagosi atë në Parlament pas një sherri që degjeneroi në fyerje banale. Hajdari u plagos me 5 plumba duke i shpëtuar mrekullisht vdekjes, ndërsa Mazreku vuajti dënimin përkatës në burg. Ai vdiq pak kohë pasi doli nga burgu për shkak të një sëmundje të rëndë, ndërsa fill pas kësaj ngjarje, qeveria mori masa për herë të parë që deputetët të ç’armatoseshin para se të hynin në Kuvend.
Shtator 1998 – Atentati ndaj Hajdarit
Një nga ngjarjet më të bujshme është ajo e vrasjes së Hajdarit pasi ishte përballur me disa atentate. Në atë kohë deputet demokrat, Hajdari u vra para zyrës së PD ndërsa dëshmia e Jaho Salihit (i dënuar për këtë ngjarje) flet se Hajdari doli nga zyra me një armë në dorë, çka bëri që Fatmir Haklaj ta vriste i pari.
Korrik 2009 – Bombë në çantën e deputetit të PS
Gjashtë muaj para se të humbiste jetën në një aksident, ish-deputeti i qarkut Shkodër Lek Çukaj u përball me një shoqërim në Komisariatin nr. 3 në Tiranë, që do të hetonte një ngjarje të veçantë. Nje 37-vjecar dorëzoi një çantë, që e kishte gjetur në lokal të harruar dhe gjatë kontrollit policia gjeti brenda edhe një granatë. Në dokumentet e identifikimit rezultoi se çanta i i përkiste ish-deputetit Lekë Çukaj. Gjatë marrjës në pyetje, 60-vjeçari pranoi se mbante mjetin luftarak prej vitit 1999 për shkak të vetëmbrojtjes, pasi vendi kishte destabilitet dhe për shkak të disa ngjarjeve të tjera të ndodhura në Shkodër. Mediat raportonin në atë kohë se një prej djemve të ish-deputetit, ishte i shpallur në kërkim, ndaj u pranua si argument edhe mbajtja e mjetit luftarak gjatë dëshmisë. Çukaj, 8 vjet deputet, humbi në 2005.
Shkurt 2011 – Olldashi & Topalli, qitje me armë
Vetëm pak ditë pas ngjarjes së rëndë të 21 Janari, në media u shpërndanë një sërë fotografish teksa ish-ministri i Brendshëm dhe kryetarja e Kuvendit shfaqeshin duke qëlluar me automatikë të modelit MP5.
Maj 2012 – Deputeti qëllon në stadium
Deputeti demokrat, Dash Sula shkoi drejt një veprimi ekstrem, teksa qëlloi me pistoletë në stadium, në ndeshjen Shkumbini-Flamurtari, që zhvillohej në Peqin.
Shtator 2015 – Armando Prenga plagos me armë
Deputeti i Partisë Socialiste, Armando Prenga u arrestuar për përfshirje në një sherr me anëtarë të familjes Cali në Laç. Shkak për përplasjen është bërë një konflikt mes tyre, në lidhje me tenderin për peshkim në Lagunën e Patokut.
Mars 2016 – Deputeti Strazimiri me armë në protestë
Një lajm i hamendësuar të paktën deri në një përgjigje zyrtare nga policia, është ai i shfaqjes së Gent Strazimirit me armë në brez në Tiranë.
