Anton Martini nga prokuror i Krimeve të Rënda u transferua në Shkodër si prokuror i thjeshtë. Dyshimet mbi këtë transferim janë shtuar kur mediat publikuan përgjimet e boss-it të drogës Jurgen Molla. Në një bisede telefonike ai i ka thënë nënës së shokut të tij, Arben Prendi (i arrestuar) se kam paguar 150 mijë euro për të larguar prokurorin e çështjes, Martini.
Por Prokuroria e Përgjithshme i mohon këto akuza. Ajo thotë se “Anton Martini është transferuar në drejtim të Prokurorisë së Shkodrës me kërkesën e tij, administruar pranë Drejtorisë së Burimeve Njerëzore dhe Inspektimit, në muajin shtator 2015”.
“Procesi i transferimit të tij përfundoi në dhjetor 2015, pasi u shqyrtua fillimisht nga Këshilli i Prokurorisë”, thuhet në njoftimin zyrtar.
Por e verteta është ndryshe. Anton Martini asokohe kishte kërkuar nga këshilli i prokurorisë që të konkurojë si drejtues i prokurorisë pranë Gjykatës së Rrethit Gjyqësor Shkodër. Pra si drejtues prokurorie dhe jo si prokuror i thjeshtë siç është tani.
Kështu dyshimet mbi këtë transferim, pas reagimit të prokurorisë, nuk zbehen aspak, përkundrazi… Shtohen dyshimet edhe për faktin se biseda e përgjuar telefonike nuk mohohet nga organi i akuzës dhe madje transferimi i prokurorit ka ndodhur në datat të përafërta me këtë bisedë.
Kujtojmë se javën e kaluar, DEA amerikane me mbështetjen e policisë dhe prokurorisë sonë realizuan një superoperacion duke kapur një nga bandat më të mëdha të drogës që vepronte mes Turqisë dhe Shqipërisë. Kreu i bandës dyshohet të jetë Jurgen Molla, biznesmen ndërtimi, bashkë me dy të tjerë. Hetimet për këtë grup narkotrafiku vazhdojnë. /Opinion.al
