Kreu i Kuvendit të Shqipërisë, Ilir Meta në 25 vjetorin e parlamentit pluralist demokratik ka bërë një falenderim të veçantë për gruan e ish-Kryetarit të Kuvendit të Shqipërisë, Pjetër Arbnori, si dhe gruan e liderit të Levizjes së Dhjetorit, Azem Hajdari.
Gjithashtu, kryefjalë e fjalimit të tij të mbajtur në Pallatin e Brigadave ka qenë konsensusi për çështjet madhore, i cili duhet të mbizotërojë mbi çdo interes të ditës.
Ndërsa ka theksuar se miratimi i reformës në drejtësi do të kthejë besimin e qytetarëve tek drejtësia dhe besimin e investitorëve.
“Këtë kohë që kemi përpara duhet ta shfrytëzojmë me largpamësi sepse miratimi i reformës në drejtësi do të kthejë besimin e qytetarëve tek drejtësia por edhe besimin e investitorëve në mundësitë që ofron Shqipëria. Është detyra jonë historike për ta çuar këtë proces përpara. Shpreh bindjen se do ta kalojmë këtë sfidë me sukses dhe do të mbahemi mend si kuvendi i reformës në drejtësi”, theksoi Kreu i Parlamentit, Ilir Meta.
Më tej, ai tha se falë mbështetjes së pakursyer të partnerëve tanë strategjik, Shqipëria sot është një anëtare e respektuar e NATO-s dhe kandidate për në BE.
Ndërsa theksoi se shembulli i qartë i rolit të Shqipërisë në arenën ndërkombëtare është organizimi pas 1 muaji i asamblesë parlamentare të NATO-s për herë të parë.
“Pavarësisht arritjeve të shumta kemi ende shumë rrugë për të bërë, për të përmirësuar vetveten dhe politikbërjen, ekonominë kombëtare dhe t’i ofrojmë qytetarëve më shumë siguri”, tha Meta.
