KORÇË- 24vjeçarja nga Korça, Vjollca Shkëmbi ka ndryshuar sërish dëshminë në polici lidhur me pengmarrjen e saj për të cilën dy persona janë arrestuar. Ajo tha se kishte qenë e kërcënuar nga i ati Urim Qazimajt për të pohuar lidhjen me të. Sipas saj, historia e vertetë është se e ka mbajtur peng për 7 ditë në një banesë në fshatin Pojan të Korçës. Ajo tha personat e arrestuar e kanë shitur 4 herë në Maqedoni për prostitutë.
Më 24 dhjetor, policia e Korçës arrestoi dy persona, Urim Qazimaj dhe Mersin Myrtollari, të akuzuar për rrëmbimin e 24vjeçares, dhe shitjen e saj në Maqedoni për 400 euro.
Sipas policisë, dy të arrestuarit Urim Qazimi, 23 vjeç, dhe Mersin Myrtollari, 50 vjeç, në bashkëpunim me njëri-tjetrin, më 23 dhjetor në fshatin Dobranj, Devoll, kishin rrëmbyer forcërisht, për qëllim fitimi, nga banesa e saj, shtetasen V.Sh, 24 vjeç.
“Nga hetimet e kryera, rezultonte se shtetasi Urim Qazimaj, e ka shitur disa herë 24vjeçaren, në Maqedoni, në persona të ndryshëm, në këmbim të përfitimit
material prej tyre (shumës prej 400 Euro) Urim Qazimaj, kishte qëllim sërish, që të kalonte së bashku me 24vjeçaren, në shtetin Maqedonas”, thuhet në njoftimin e policisë.
Pas kësaj, Qazim Qazimaj, 52 vjeç, i ati i Urim Qazimajt njërit prej të arrestuarve dyshohet se ka mbajtur peng vajzën për 7 ditë me qëllim që djali i tij të dilte nga burgu, si edhe vajza me inicialet V.SH, të përgënjeshtronte kallëzimin e datës 24.12.2015.
